Formoso acusa a Rueda de apoiar a suba de impostos en Galicia e pedir a súa supresión en Madrid

O secretario xeral do PSdeG, Valentín González Formoso, acusou este luns ao Goberno galego de subir o metro cúbico de auga uns 33 euros de media, un 61,6% máis, coa nova Lei do ciclo da auga, aprobada no último pleno da Cámara.

Nunha rolda de prensa ofrecida no Parlamento de Galicia xunto aos viceportavoces socialistas Luís Álvarez e Begoña Rodríguez Rumbo, Formoso asegurou que se trata dun "atropelo ao pobo galego en forma de sablazo fiscal". "Nun momento no que Feijóo pide en Madrid unha política de redución fiscal, deixa aprobada aquí --en Galicia-- unha norma que é un sablazo fiscal para todos os galegos", dixo.

En relación a esta lei que se aprobou no último pleno da Cámara galega, Formoso asegurou que, tras estudar 74 ordenanzas fiscais de 74 concellos, observaron unha subida media de 33 euros por metro cúbico en cada concello.

O xefe de filas dos socialistas galegos acusou ao Goberno galego de "extorsionar" aos municipios. "Se non se adhiren á nova sociedade que pretende crear a Xunta, non terán ningún novo investimento", apuntou para asegurar que se trata dunha "extorsión en toda regra" e de "un ataque á autonomía local".

Así mesmo, considerou que a nova lei supón un "ataque á libre competencia" tendo en conta que a Xunta, que "é quen ten a competencia para fixar as tarifas reguladas". "É quen regula o marco normativo e vai operar como empresa no propio sector", indicou.

"Vai en contra de todas as regras de competencia europeas e non descartamos recorrer, primeiro a través da FEMP e despois a propia Comisión Europea, para que se analice a compatibilidade dun operador que xestione a auga pública e que, ademais, teña capacidade normativa de decidir sobre a xestión nese ámbito", sostivo.

RESPOSTA DO PPDEG

Respecto diso, nunha rolda de prensa posterior, o viceportavoz parlamentario do PPdeG Alberto Pazos asegurou que as afirmacións realizadas por Formoso foron "desmentidas" pola Federación Galega de Municipios e Provincias (Fegamp) presidida por un alcalde socialista, en referencia a Alberto Varela.

Así, indicou que, nun primeiro momento, o ente municipalista expresara o seu temor a que se producise unha subida, pero que despois "recoñeceu que cometera un erro". Por iso, sostivo que "sorprende" que "se volva a insistir nunha vella polémica desmentida polos mesmos que a provocaron".

RESPOSTA DA XUNTA

A Xunta, pola súa banda, criticou que o secretario xeral do PSdeG, Valentín González Formoso, "confunda subir impostos" con "elevar a calidade" das augas e mellorar servizos e lembra que a nova lei do ciclo da auga aínda non entrou en vigor pero que "moitos concellos están a subir as tarifas da auga a causa do encarecemento da luz, que dispara os custos de depuración".

O Executivo autonómico sostivo que a Lei de mellora da xestión do ciclo integral da auga que impulsa o Goberno galego e que acaba de ser aprobada non crea novas taxas aos usuarios e, por tanto, "non é certo" que vaia a subir as tarifas da auga en Galicia. "O único que incrementa a lei é a calidade dos servizos da auga e o coidado das rías e ríos", apuntou.

Así mesmo, sinalou que, na actualidade, quen emite os recibos da auga que paga a veciñanza son os concellos e que coa nova lei van seguir sendo as Administracións locais as que o fagan e as que decidan que conceptos inclúen nese recibo. "Por tanto, van ser os concellos quen decidan se cobran menos ou se cobran máis aos seus veciños, como facían ata agora", subliñou.

De feito, a Xunta sostén que, cando a lei aínda non entrou en vigor, hai moitos exemplos recentes de concellos que xa lle subiron a tarifa e apunta a varios gobernados polo PSOE como os de Ponteareas, O Grove ou Viveiro. "Tamén Carballo ou Tomiño subiron as tarifas sen necesidade desta lei", sinala en referencia a estes dous últimos municipios gobernados polo BNG.

Por iso, considera "lamentable" que o PSdeG confunda subir impostos con incrementar a calidade das augas e a mellora dos servizos. "Quen realmente está a subir o recibo da auga é o Goberno de España ao permitir a subida desmesurada do prezo da luz", apunta.

INFLACIÓN

Por outra banda, en rolda de prensa e preguntado polo fin do período de sesións na Cámara galega, Formoso considerou que todas as forzas políticas deben de estar centradas en dar resposta a unha situación de dificultade na socioeconomía galega derivada da carestía da vida.

"No ámbito das empresas estamos a ver como hai empresas relevantes que están ou pechadas polos custos da enerxía ou que ameazan do peche inmediato se isto segue así", sinalou para indicar que, neste contexto, o PSdeG solicitou tanto á Xunta como ao Goberno do Estado medidas.