Unha investigación da USC releva unha posible relación xenética entre a Covid e o cancro
"No caso de que estudos máis grandes en mostra e extensos en seguimento o confirmen, o impacto en saúde pública mundial sería enorme", sinalaron os encargados do estudo.
Por Europa Press / Redacción | SANTIAGO DE COMPOSTELA | 07/09/2022 | Actualizada ás 19:13
Un estudo realizado por investigadores da Universidade de Santiago de Compostela (USC) detectou evidencias moleculares da posible relación xenética entre a infección da Covid-19 e o cancro.
"Isto non demostra unha relación causal entre o SARS-CoV-2 e o cancro, pero no caso de que estudos máis grandes en mostra e extensos en seguimento o confirmen, o impacto en saúde pública mundial sería enorme", sinalaron os encargados da investigación, dirixida polos profesores Antonio Salas e Federico Martinón xunto con Alberto Gómez Carballa do Instituto de Investigación Sanitaria (IDIS).
Segundo informou a USC, o proceso consistiría, segundo evidencias do estudo, en que os antíxenos do SARS-CoV-2 "secuestran" a proteína oncosupresora p53 levando á súa dexeneración por dano oxidativo.
Desta forma, segundo os investigadores, o SARS-CoV-2 aproveitaría as vías controladas por p53 durante a fase de infección, eludindo as respostas inmunitarias. Así, isto podería implicar que a inhibición a longo prazo desta proteína por parte do SARS-CoV-2 podería ser un factor de risco de carcinoxénese.
Os investigadores indicaron que durante o estudo obtiveron evidencia de que pacientes na fase aguda do Covid-19 e os de infección con Covid-19 persistentes mostraban unha baixa presenza de p53.
