Os trens Avril "non van chegar" a Galicia en 2022 porque "as probas de seguridade son as que son"

A secretaria de estado de Transportes, Isabel Pardo de Vera, informou de que os trens Avril comprometidos polo Goberno para levar a alta velocidade ao resto de cidades galegas --a maiores de Ourense-- "non van chegar" en 2022, ao acumular un atraso por parte de Talgo, que é o fabricante.

"A este 2022 non van chegar, efectivamente. Con toda a documentación e a homologación o que fixen é contrastar coa Axencia Estatal de Seguridade, que é a que ten que dar os permisos, e facendo os cálculos non chega. Esperemos que non se afaste moito, uns meses", destacou Pardo de Vera, a preguntas dos xornalistas durante unha visita a Ames.

Así, explicou que "o problema de fondo" vén de "a demora en construír os trens" e asegurou estar a facer un "seguimento" desde a secretaría de estado. "É un prototipo inédito e require unhas probas de seguridade que son as que son e ata que Talgo cumpra non se vai a aprobar", constatou, antes de incidir en que "se se empezaron a fabricar en 2017 e non se tiraron dous anos e algo para empezar o problema non estaría na homologación", que é o proceso que se aborda agora.

O próximo 5 de outubro, segundo apuntou, está convocada unha nova reunión técnica e a secretaria de estado subliñou que o seu compromiso é que os trens estean "canto antes, nos próximos meses", á marxe de discusións entre Talgo e Renfe. En calquera caso, engadiu que sente "pero os problemas non se atallan nun ano" e neste caso, insistiu, "veñen de atrás". "No tema de alta velocidade non creo que deba eu ser cuestionada", concluíu.