Nace a Ourense Film Commission, "unha ferramenta para impulsar" o sector audiovisual

No marco do Ourense Film Festival, o Festival Internacional de Cinema de Ourense, tivo lugar a presentación da Ourense Film Commission, "unha ferramenta" que o presidente da Deputación provincial e presidente da organización, Manuel Baltar, describiu como "nacida despois de anos de traballo para tecer todas as potencialidades, favorecendo e impulsando o sector audiovisual como axente dinamizador da provincia".

Ao acto de presentación acudiron o presidente da Spain Film Commission, Carlos Rosado, o presidente da Minh Film Commission, Rui Ramos e a coordinadora de política audiovisual da Xunta de Galicia en representación da Galicia Film Commission, Dolores Meijomin. Todos resaltaron a importancia destas organizacións na dinamización da cultura e a promoción dos territorios a través da industria audiovisual.

Para Carlos Rosado, da Spain Commission, a recente incorporación da comisión ourensá "supón un gran éxito" porque en Galicia "hai unha enorme riqueza cultural que achega a súa identidade aos proxectos rodados na comunidade". Outro dos aspectos que resaltaron é a xeración de emprego ao redor da industria audiovisual, "que achega riqueza económica aos territorios nos que se desenvolven as rodaxes".

"SALTO CUALITATIVO"

Neste sentido, o presidente da Minho Filme Commission, Rui Ramos, explicou o "salto cualitativo" que supuxo para a industria portuguesa a creación da organización porque "achegou a industria ao resto do mundo, e puxo en contacto coas cinematografías doutros países axudándonos á internacionalización".

Pola súa banda, Meijomín destacou "a gran cantidade de talento que hai agora mesmo" en Galicia e "a gran cantidade de proxectos audiovisuais" que se desenvolven aquí, facendo fincapé en que "as grandes plataformas rodan en Galicia da man de produtoras independentes, que son as grandes captadoras de historias e talento".

AXUDAS A TRECE INICIATIVAS

Noutra orde de cousas, a Deputación de Ourense concedeu 175.000 euros en axudas para financiar trece iniciativas presentadas por entidades locais, empresariais, sociais e culturais.

En canto ao ámbito da cooperación con concellos, a institución provincial aprobou unha subvención de 10.000 euros para Carballeda de Valdeorras para o campamento de verán e outras actividades correspondentes ao presente ano; o municipio de Cenlle tamén recibirá 10.000 euros para gastos de bombeo en alta de Razamonde; e Cortegada contará con 18.000 euros para a redacción de proxectos Next Generation-Crecente.

Por outra banda, o Concello do Irixo vai dispor dunha axuda de 12.000 euros para o proxecto 'Marca Irixo'; Nogueira de Ramuín poderá acometer traballos ambientais cunha subvención de 24.000 euros; e San Cristovo de Cea destinará 25.000 euros ao museo etnográfico Olimpio Liste.

Así mesmo, o capítulo de colaboración con entidades inclúe a aprobación dunha subvención de 15.000 euros para gastos de funcionamento da asociación Escola Rural de Saúde da Limia; 12.000 para cooperar co Colexio de Economistas de Ourense; 3.000 para a edición de libro de fotopoemas e a celebración dos premios que concede a asociación cultural e deportiva 'Basket x Libros'; 14.000 euros a favor do Consello Regulador de Denominación de Orixe Ribeiro para un servidor de 'hardware' de datos; 15.000 euros para Cruz Vermella con destino á adquisición dun vehículo de reforzo; 9.000 euros para a Agrupación Musical da Limia con motivo do campionato mundial de bandas de música; e 8.000 para actividades da sociedade Amigos Banda de Música de Celanova.