Por Europa Press / Redacción | SANTIAGO DE COMPOSTELA | 27/09/2022 | Actualizada ás 18:01
A entidade Defensa do Común organizou para o 5 de novembro unha marcha cívica para reclamar a devolución ao patrimonio público da Casa Cornide, na actualidade propiedade dos Franco.
Así o acordaron tras unha asemblea na que participaron 20 entidades da cidade herculina. Nela, abordouse a "resposta social" ante o anuncio da familia do ditador de pór á venda de novo este inmoble, situado na Cidade Vella da Coruña. Trátase dunha marcha en demanda da devolución da Casa Cornide ao patrimonio público e que sairá ás 12,00 horas da praza de María Pita en dirección ao inmoble.
A lema será 'Que devolvan todo o roubado. Despois do Pazo de Meirás, recuperación para o pobo da Casa Cornide', informan os convocantes, que engaden que será unha marcha con carácter lúdico e reivindicativo.
A ela, súmase unha proposta de moción aos grupos municipais no consistorio coruñés para o pleno do 13 de outubro no que, entre outras cuestións, instan o goberno local a que presente unha demanda xudicial para "anular o título de propiedade" do inmoble de face á súa incorporación ao "patrimonio público municipal".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.