O Parlamento insta a Xunta a cumprir as recomendacións da Comisión dos incendios de 2018
O PP sinala que as medidas xa están incluídas no Plan Forestal, co que o PSdeG "non estaba de acordo cando se presentou".
Por E.P. | Santiago de Compostela | 28/09/2022 | Actualizada ás 14:09
O pleno do Parlamento galego aprobou este mércores unha proposición non de lei presentada polo Grupo Socialista na que se insta á Xunta a cumprir as recomendacións realizadas pola Comisión sobre política forestal e prevención de incendios forestais de 2018.
A iniciativa foi defendida no pleno pola deputada socialista Carmen Rodríguez Dacosta, que afirmou que "moitas das melloras que propuñan" as conclusións desta comisión "non foron implementadas nin asumidas polo Goberno galego" catro anos despois. "Hoxe teñen unha nova oportunidade política para revisar o fracaso das políticas forestais do PP dos últimos anos", dixo a deputada, que lembrou os incendios sufridos este mesmo verán en Galicia.
Entre os "incumprimentos" que sinalou Rodríguez Dacosta mencionou "a elaboración dos plans de ordenación de recursos forestais en cada un dos 19 distritos durante os anos 2019-2024", que "foron atrasados ao período 2026-2030", así como "a centralización das funcións en materia de prevención e vixilancia nun ente específico dependente da Xunta, que se tiña que constituír antes de xullo de 2019 e aínda non existe".
"Tamén incumpren coa obrigada coordinación do Plan Forestal coas políticas e recursos da Consellería de Medio Ambiente, como demostraron este mesmo verán, coa conselleira escondida e o titular de Medio Rural negándose a comparecer no Parlamento", dixo a deputada do PSdeG, que indicou que debería aprobarse antes de final de 2020 o catálogo de terreos e alta produtividade agropecuaria, ou dar conta no Parlamento cada ano do cumprimento das recomendacións.
PLAN FORESTAL
O PPdeG, pola súa banda, apoiou a iniciativa, defendeu o traballo da Xunta neste campo e alegou que o que se pide ao Goberno galego é que cumpra co Plan Forestal xa en marcha, co que os socialistas "non estaban de acordo cando se presentou en sede parlamentaria para a súa aprobación".
O deputado popular José Antonio Armada expresou a súa "sorpresa" porque sexan os socialistas "os que tamén insten a Xunta ao cumprimento das recomendacións" do ditame da comisión especial, "cando foi o actual conselleiro de Medio Rural" o que "conseguiu que saíse adiante este documento". "É o mellor coñecedor do seu contido e o máis interesado no seu cumprimento", dixo.
"Para nós é unha satisfacción que os socialistas se conformen co recollido no Plan Forestal, un documento no que se recollen máis do 70% das recomendacións do ditame da comisión", dixo Armada. A iniciativa contou cos votos a favor de PPdeG e PSdeG e coa abstención do BNG, que lembrou a súa oposición ao Plan Forestal e ao ditame da comisión, xa que, consideran, non busca "un cambio real de modelo" no medio rural galego.
