As mulleres con discapacidade, máis expostas á violencia sexual
Catro vídeos interactivos buscan "facer partícipe" ás persoas das violencias que sofren mulleres con discapacidade.
Por E.P. | SANTIAGO DE COMPOSTELA | 03/10/2022 | Actualizada ás 14:09
A campaña 'Que farías ti?' da Xunta e a Asociación de Mulleres con Discapacidade de Galicia (Acadar) busca a través de catro vídeos interactivos "facer partícipe" á persoa espectadora das violencias, sobre todo a sexual, e problemas que sofren as mulleres con discapacidade, así como sensibilizar e reclamar máis implicación para previla.
O proxecto foi presentado este luns nun acto no que participou a conselleira de Promoción do Emprego e Igualdade, María Jesús Lorenzana; a presidenta de Acadar, Mónica Álvarez; e o presidente da Confederación Galega de Persoas con Discapacidade (Cogami), Anxo Queiruga.
Desta forma, a campaña xorde da "necesidade de que a cidadanía coñeza a realidade", sinalou a coordinadora técnica de Cogami, Mariluz Vázquez. Así, a iniciativa desenvólvese a través de catro pezas audiovisuais interactivas, "para facer participes ás persoas e que se poñan no seu lugar", remarcou Vázquez.
O primeiro paso para producir as obras audiovisuais foi xuntar a varios grupos de mulleres para que, a través de talleres, tratasen as diferentes temáticas desde as súas vivencias. A conselleira destacou a importancia do proxecto xa que as "mulleres con discapacidade enfróntense a unha dobre discriminación, por ter unha discapacidade e por ser mulleres".
Unha das pezas audiovisuais, a do director Mar Catarina, que creou un collage coa precariedade e o risco de exclusión social, xa pode visualizarse na páxina web de Acadar. Segundo o Observatorio sobre a discapacidade e o mercado de traballo, o 32,5% de persoas con discapacidade atópase en risco de pobreza ou exclusión social.
DATOS PARA MOSTRAR A REALIDADE
A presidenta de Acadar expuxo os datos da macroenquista contra a violencia do ano 2019 para ilustrar esta realidade. "As mulleres con discapacidade están máis expostas a vivir unha situación de violencia sexual ao longo da súa vida, concretamente a 42,1% fronte ao 36,95%", lamentou.
Tamén o 35,1% de mulleres con discapacidade --fronte ao 18,1% sen discapacidade-- "foron obrigadas a manter relacións sexuais sen o seu consentimento". Así mesmo, indicou como "dato preocupante" que o 41,4% de persoas con discapacidade que viron unha situación de violencia sexual "non falaron con ninguén sobre a situación".
Ademais, Lorenzana indicou que as mulleres que integran este colectivo sofren violencia sexual fóra da parella "en maior medida que as mulleres sen discapacidade". Con todo, apuntou que as persoas con discapacidade denuncian "en maior proporción", un 30,8% fronte a un 20,9%, e que tamén "buscan máis axuda", unha 50,5% fronte ao 31,1%.
OUTRAS MEDIDAS CARA Á IGUALDADE
A responsable de Igualdade lembrou que o Executivo autonómico ten en trámite a nova lei de igualdade entre mulleres e homes, que inclúe como eixos transversais a interseccionalidade. "Aspiramos a que sexa absolutamente aberta e recolla o que está na sociedade", subliñou a conselleira.
Nesta liña, sinalou os plans específicos tanto para a mocidade como para a muller e as persoas con discapacidade e exclusión social, xa que "son as persoas máis vulnerables e as que máis necesitan os apoios públicos". Tamén, incidiu no novo servizo de emprego no que, "aspira realizar" unha orientación profesional adaptada ás necesidades, aptitudes e preferencias que ten cada persoa, xa que "é unha fórmula idónea, porque é máis rica e xusta".
