Valdeorras sumarase ao 'brinde colectivo' para poñer en valor as D.O. de todo o estado
A acción, enmarcada no 'Día Movemento Viño D.O.', terá lugar o vindeiro 22 de outubro e nela participarán 36 denominacións de orixe a nivel nacional.
Por Galicia Confidencial | Vilamartín de Valdeorras | 09/10/2022 | Actualizada ás 10:30
O Consello Regulador da D.O. Valdeorras súmase ao Día Movemento Viño D.O., que terá lugar o vindeiro 22 de outubro. Trátase dunha acción que naceu en 2017 na que se pon en valor o traballo e a fiabilidade das denominacións de orixe cun brinde colectivo, simultáneo e simbólico.
Nesta sexta edición, e baixo o lema “Denominacións de orixe, territorios sustentables”, volve ao seu formato presencial e farao ao grande, reunindo o maior número de denominacións de orixe vitivinícolas que participaron neste evento ata a data: 36.
O Movemento Día Viño D.O. celebra así mesmo a decisión de unirse viticultores e adegas para protexer o patrimonio colectivo e contrastado que fai que as uvas e os viños dos territorios amparados sexan únicos e diferentes do resto cunha calidade recoñecida e unida a unha orixe concreta.
SUSTENTABILIDADE
Este ano, ademais, reivindícase que as denominacións de orixe son ferramentas que contribúen á sustentabilidade nos seus territorios cun importante protagonismo de cambio no medio rural. "Son entidades que amosaron a súa resilencia e a súa capacidade de adaptación ao longo dos anos a base de intelixencia colectiva e de asunción de compromisos e responsabilidades coa súa contorna", tal e como se sinala dende a Confederación Española de Consellos Reguladores Vitivinícolas (CECRV), entidade que promove este evento.
