A Lei galega do clima contará cos concellos "como peza clave" para acadar a neutralidade climática

A futura Lei do clima de Galicia contará coa implicación dos concellos galegos "como peza crave" para cumprir os obxectivos de neutralidade climática canto antes e como prazo límite, en 2050. Segundo informou a Xunta, esta é unha das mensaxes que trasladará a Consellería de Medio Ambiente, Territorio e Vivenda no marco da vixésima edición da Semana europea das rexións e cidades.

Baixo o lema 'Novos retos para a cohesión de Europa', esta edición congregará entre o 10 e o 13 de outubro a máis de 10.000 persoas para debater sobre transición ecolóxica e dixital, así como para abordar as políticas de cohesión territorial en resposta á crise climática.

Así mesmo, recibirán especial atención ao papel que desempeña a política de cohesión na recuperación sustentable de Europa como o instrumento máis eficaz de solidariedade en resposta á emerxencia e ás consecuencias da crise. Ademais, ao longo da semana haberá talleres, testemuños e exposicións.

A Consellería foi convidada a participar pola Comisión Europea en recoñecemento ao seu papel como coordinadora do Pacto das alcaldías para o clima e a enerxía desde 2017 e que se celebra este ano en formato híbrido con sesións presenciais en Bruxelas e intervencións virtuais, segundo sinalou o Executivo.

Desta forma, apuntaron que representantes da Dirección Xeral de Calidade Ambiental, Sostenibilidade e Cambio Climático participarán este mércores, de forma telemática, no evento 'Rexións que abordan o desenvolvemento urbano sustentable a través de proxectos de política de cohesión', onde exporán a súa experiencia do últimos cinco anos para impulsar a implantación do Pacto en Galicia.

Nesta liña, o Goberno galego destacou que o traballo realizado pola administración autonómica permitiu pasar dos 22 concellos, que había adheridos antes de que a Xunta asumise o papel de coordinadora, ás 285 entidades locais galegas que actualmente forman parte desta iniciativa, considerada o "maior movemento a nivel mundial para buscar sinerxías locais ante o cambio climático".