Por E.P. | OURENSE | 14/10/2022 | Actualizada ás 19:44
O presidente da Deputación de Ourense, Manuel Baltar, mantivo en Bruxelas unha reunión co novo presidente do Comité Europeo das Rexións, Vasco Cordeiro.
No seu primeiro acto como presidente de Partenalia despois de ser reelixido como líder desta rede europea de gobernos intermedios durante dous anos máis, Manuel Baltar valorou a importancia do "encontro directo, na sede do Comité Europeo das Rexións" entre a directiva da federación e Vasco Cordeiro, o máximo representante da institución comunitaria dos entes administrativos locais.
"Unha reunión de traballo cordial e moi frutífera, na que atopamos a complicidade e o agarimo dun home que coñece perfectamente a organización territorial porque foi presidente da rexión autónoma dos Azores", explicou Baltar. O presidente da Deputación de Ourense e de Partenalia trasladou ao presidente do Comité Europeo das Rexións unha "petición moi clara": a mellora no acceso das administracións provinciais aos fondos europeos.
"A demanda é nítida: abrir ás provincias todos aqueles programas e plans de axudas que neste momento só contemplan aos municipios, tendo en conta a nosa capacidade e xestión dos gobernos supramunicipais", engadiu. Porque as autoridades locais intermedias de Europa, agrumentou, "deben ter tamén a oportunidade de xestionar estes fondos, porque o estamos facendo satisfactoriamente, como o demostramos noutros programas europeos, executándoos á perfección".
Nun comunicado, traslada que puido constatar "a complicidade de Vasco Cordeiro" ante unha reivindicación "seria e completamente rigorosa, que se apoia no coñecemento do territorio, na proximidade á poboación, en coñecer as oportunidades e os retos de cada provincia e en desenvolver a economía de escala que practicamos as entidades supramunicipais cos concellos, suplindo a súa falta de medios para garantir os mellores servizos públicos aos veciños".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.