Por E.P. | Ourense | 15/10/2022 | Actualizada ás 19:50
O BNG reiterou o seu apoio aos traballadores do metal ourensán e animou á sociedade a participar na próxima mobilización, prevista para o 19 de setembro ás 11,00 horas desde a casa sindical. Esta será a terceira semana de folga do sector do siderometal, tras iniciar os paros o 5 de outubro e despois das mobilizacións do 28 e o 29 de setembro.
A deputada nacionalista, Noa Presas, eloxiou a valentía dos traballadores que, "en condicións moi precarias, tomaron a decisión de defender os seus dereitos ante unha situación precaria e insustentable, un exemplo de loita que defende a dignidade do resto da clase traballadora".
Ademais, lembrou que a negociación dun novo convenio colectivo é "fundamental" para "non deixar xente á intemperie nunha crise de prezos que está a afogar os fogares e que en Ourense é máis intensa que no resto de Galicia e do Estado".
Nesta liña, a formación nacionalista lembrou que a inflación continúa desbocada e que, nos datos publicados este venres, "a de Ourense está nun 9,7%, por enriba do 9,2% galego e do 8,9% estatal, o que provoca unha perda de poder adquisitivo brutal nos traballadores do metal ourensán".
Presas avoga por unha saída "negociada" da situación, para o que é preciso "que cese o inmobilismo da patronal e o pasotismo da Xunta, que unha vez máis non exerce as súas funcións para favorecer unha solución".
"Este é o goberno da demolición industrial, máis ocupado en impulsar reformas fiscais que favorezan as grandes fortunas que de fomentar unha economía baseada nunha industria asentada no valor engadido e con condicións laborais dignas", aseverou.
Por último, Presas lembrou que os nacionalistas xa avanzaron no Parlamento unha serie de iniciativas para "acompañar a loita sindical e que os seus problemas sexan escoitados".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.