A participación no programa de detección precoz de cancro de mama supera o 80% nas catro provincias
Por E.P. | SANTIAGO DE COMPOSTELA | 18/10/2022 | Actualizada ás 14:07
Un total de 168.560 mulleres foron exploradas no ano 2021 no marco do Programa Galego de Detección Precoz do Cancro de Mama, o que implica unha adherencia á iniciativa do 82% no conxunto da comunidade.
Segundo os datos proporcionados este martes pola Consellería de Sanidade, deste total, 67.299 eran da provincia da Coruña (82,6%), 17.789 da de Lugo (82,7%), 20.464 da de Ourense (80,4%) e 63.008 da de Pontevedra (81,7%). De feito, o Sergas lembra que, desde o ano 2006, a participación neste programa é superior ao 75%, obxectivo desexable establecido polas Guías Europeas de Garantía de Calidade en Cribado e Diagnóstico Mamográfico.
De todas as mulleres exploradas, 97,3% tiveron un resultado negativo e o 2,7% restante requiriron unha valoración clínica adicional para confirmar ou refutar a presenza dunha lesión maligna. Con datos pechados para o ano 2020, a taxa global de detección de cancro de mama foi de 4,4 casos por cada mil mulleres exploradas, e dicir, 600 casos detectados polo programa en fase presintomática.
DÍA INTERNACIONAL CONTRA O CANCRO DE MAMA
A Consellería de Sanidade quere conmemorar o Día Internacional de loita contra o cancro de mama, que se celebra este mércores baixo a lema 'Pechar a brecha de atención', sinalando que esta patoloxía é a primeira causa tumoral de morte en mulleres nesta contorna.
