Os inmigrantes, o futuro poboacional de Galicia
O número de habitantes en Galicia sobe en 1.995 persoas a primeira metade do ano pola inmigración, ata 2.693.451 habitantes.
Por Europa Press / Redacción | SANTIAGO DE COMPOSTELA | 18/11/2022 | Actualizada ás 11:26
A poboación de Galicia incrementouse en 1.995 persoas durante a primeira metade do ano debido ao saldo migratorio exterior e interior, xa que o vexetativo foi unha vez máis negativo (máis mortes que nacementos).
Así, o total de habitantes de Galicia sitúase en 2.693.451 a 1 de xullo de 2022, ao contabilizar 10.651 falecementos máis que nacementos, pero saldos positivos sobre todo na migración exterior (+12.106) e tamén na interior (+622).
No conxunto estatal, a poboación de España aumentou en 182.141 persoas durante a primeira metade do ano e situouse en 47.615.034 habitantes. Durante o primeiro semestre de 2022 a poboación creceu en 14 comunidades autónomas e reduciuse nas tres restantes, así como nas cidades autónomas de Ceuta e Melilla.
Os maiores incrementos en termos relativos déronse en Madrid (0,82%), Illes Balears (0,68%) e Comunitat Valenciana (0,66%).No outro extremo, os descensos de poboación máis acusados déronse en Estremadura (-0,15%), Principado de Asturias (-0,08%) e Castela e León (-0,03%).
Mentres, todas as comunidades presentaron saldo migratorio positivo co exterior na primeira metade de 2022. Os maiores déronse en Comunidade de Madrid (54.328), Cataluña (40.823) e Comunitat Valenciana (39.494). Pola contra, as comunidades con menores saldos migratorios foron A Rioxa (1.490), Estremadura (2.222) e Cantabria (2.809).
Os saldos migratorios entre comunidades máis positivos durante o primeiro semestre de 2022 déronse en Comunitat Valenciana (2.570), Comunidade de Madrid (1.435) e Andalucía (769). Pola contra, Cataluña (-1.468), País Vasco (-1.209) e Estremadura (-757) presentaron os saldos máis negativos.
