Por Galicia Confidencial | Verín | 25/11/2022 | Actualizada ás 09:00
O Ratiño Pérez chegará a Verín este 30 de novembro. Para darlle a benvida, a Fundación Dentalnova organizou xunto á contadora local, Raquel Queizás, unha gala pensada para os nenos e as nenas dos colexios da comarca. Ademais, a estancia do coñecido Sr. Pérez quedará gardada para o recordo nun libro que o propio personaxe fará chegar ás crianzas do val grazas á colaboración da Consellería de Cultura, Educación, Formación Profesional e Universidades da Xunta de Galicia.
Logo do éxito da caseta do Ratiño Pérez do ano pasado --que se volverá instalar este ano--, a Fundación Dentalnova quixo convencelo para que visitase a vila neste Nadal e conseguiuno. Aproveitando a súa estancia realizaranse diferentes actividades arredor da súa figura.
PUBLICACIÓN DUN LIBRO
O proxecto está vertebrado pola publicación do libro "O Ratiño Pérez", editado pola Fundación Dentalnova, no que se conta a súa vinculación co doutor Antonio. É unha historia baseada nunha idea orixinal de Edelmiro Mateo, ilustrada por María Isabel Álvarez Trujillo e cos textos de Antonio Blanes Hermida. Un conto centrado en Verín e nos seus elementos máis característicos.
Este libro serviu, ademais, de inspiración ao equipo Dentalnova e a Raquel Queizás para deseñar una gala que se representará o mércores, 30 de novembro, no Auditorio Municipal.
Nesta colaboración entre entidades públicas e privadas, o obxectivo é tamén apostar por un proxecto no que se mestura o lecer e a concienciación sobre a necesidade de coidar da nosa saude bucal.
Antonio Justo, xerente da Fundación Dentalnova, agradeceu o compromiso e a participación do Concello de Verín e da Consellería de Cultura, Educación, Formación Profesional e Universidades neste proxecto.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.