Por Europa Press / Redacción | SANTIAGO DE COMPOSTELA | 24/11/2022 | Actualizada ás 17:10
A Consellería de Política Social publicou este xoves unha ampliación de crédito que dobra a partida prevista para as axudas do Bono Coidado, un programa que financia as necesidades puntuais de conciliación e que este verán se ampliou a campamentos de verán (a condición de que non coincidisen cos períodos vacacionais de pai, nai ou titor ou coidador habitual).
Deste xeito, a Xunta decidiu ampliar a partida para o Bono Coidado, ante "o gran incremento de solicitudes presentadas para esta axuda", segundo confirmaron a Europa Press fontes do departamento autonómico, e que supuxo catro veces máis a demanda de 2021. Esta axuda concédese ata esgotar crédito por orde de petición, sempre que se cumpran os requisitos, entre os que non se inclúe o límite de renda.
O Goberno galego tiña previstos 550.000 euros nos orzamentos de 2022 e duplícase a máis de 1,1 millóns de euros, ao aumentar en 607.000,63 euros o crédito dispoñible.
De feito, a Xunta atribúe a alta demanda desta axuda ao ampliala a período non lectivo, o que levou a incrementar "considerablemente" as solicitudes, que pasaron de 1.550 en 2021 a máis de 6.000 este ano.
Segundo explicaron as mesmas fontes, o Goberno autonómico aspira a que, con esta ampliación, se poidan atender todas as solicitudes que cumpran os requisitos da orde de axudas.
O Goberno galego, ademais, mostra a súa "satisfacción" polo "éxito" dunha axuda que está "pensada para apoiar a conciliación da vida persoal e laboral" das familias.
ESCOLAS INFANTÍS
Doutra banda, o DOG tamén publica o incremento de crédito de axudas para a atención educativa de 0 a 3 anos de entidades privadas, que ascende a 10,6 millóns de euros. Actualmente, fináncianse as prazas de todos os menores que acceden a unha escola pública.
Ademais, tamén se ampliou a orde de axudas para as escolas de iniciativa social en 38.700 euros, fronte á partida inicial para este ano de 350.000. O ano anterior ascendera xa a 400.000 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.