O rei Felipe VI envía o seu pesar polo falecemento das vítimas do accidente en Cerdedo-Cotobade

Dirixentes políticos galegos aproveitaron as súas comparecencias públicas deste luns para reiterar as súas condolencias ante o accidente de autobús rexistrado en Noiteboa en Cerdedo-Cotobade. Este luns foi localizado o corpo da novena pasaxeira, co que o sinistro deixa un saldo de sete falecidos e dous sobreviventes --o condutor e outra pasaxeira--.

Os labores renováronse á primeira hora deste luns, despois de que o fillo da pasaxeira sobrevivente se puxera en comunicación cos servizos de emerxencias para alertar de que a súa nai non viaxaba soa no autobús, senón cunha familiar.

Este luns, nas comparecencias de prensa ofrecidas na Cámara autonómica tanto o portavoz parlamentario do PPdeG, Pedro Puy, como a viceportavoz nacionalista, Olalla Rodil, arrincaron as súas intervencións cunha mención de condolencia polas vítimas deste sinistro.

Puy transmitiu o seu "pésame" ás familias afectadas por un sinistro que constitúe, lembrou, "unha desgraza en si mesma". As datas do Nadal nas que se rexistrou, agregou, "fano aínda máis doloroso". Tamén Rodil trasladou o pésame do BNG e o desexo de recuperación pronta para os sobreviventes. Igualmente transmitiu o recoñecemento da formación para os servizos de emerxencias, que traballaron intensamente nos últimos días. "Somos conscientes de que non hai consolo ante unha situación así e menos nunhas datas como estas", concluíu.

PÉSAME DE CABALLERO

Pola súa banda, o alcalde de Vigo, Abel Caballero, quixo enviar o seu pésame en nome do Concello e de toda a cidade olívica aos familiares e amigos dos falecidos. Na súa rolda de prensa diaria, o rexedor vigués tamén quixo enviar o seu "agarimo" nun momento "tan duro e difícil" que supón un accidente de "gran envergadura".

GONZÁLEZ FORMOSO

O secretario xeral do PSdeG, Valentín González Formoso, traslada as súas condolencias polos falecidos no accidente de autobús en Cerdedo-Cotobade.

González Formoso comezou así este luns a súa intervención tras reunirse con representantes do cerco afectados polo recorte de cota do xurelo. En concreto, enviou as súas condolencias en nome de todos os socialistas galegos ás familias dos falecidos no que foi un día "tráxico para Galicia".

FELIPE VI

O rei Felipe VI púxose en contacto este luns co presidente da Xunta, Alfonso Rueda, para trasladar as súas condolencias e solidariedade coas vítimas do accidente de autobús de Cerdedo-Cotobade, no que faleceron sete persoas e dúas resultaron feridas.

Así o dixo o propio Alfonso Rueda, que abriu a súa intervención ante os medios antes de presidir o Comité de Dirección do PPdeG expresando de novo as súas condolencias por este suceso.

Esta mañá, profundou, o mandatario galego recibiu a chamada do Rei para "interesarse polo accidente e polo estado dos feridos" á vez que pediu que Alfonso Rueda traslade as súas condolencias e solidariedade non só aos afectados se non a "todos os galegos".