O alcalde de Vilanova publicará o venres un vídeo das persoas que tentaron incendiar a súa casa en 2021
Gonzalo Durán toma esta decisión despois de que tentarán queimar o seu coche a noite de Reis e ante "a inacción" das forzas de seguridade.
Por Europa Press / Redacción | PONTEVEDRA | 09/01/2023 | Actualizada ás 18:36
O alcalde de Vilanova de Arousa, Gonzalo Durán, anunciou que o vindeiro venres, día 13 de xaneiro, fará públicas as imaxes que tomaron as cámaras de seguridade da súa vivenda a noite do 13 de setembro de 2021, cando dúas persoas lanzaron pastillas incendiarias ao interior da súa casa.
En rolda de prensa este luns, o rexedor asegurou que tomou a decisión de facer públicas estas imaxes ante "a inacción" das forzas de seguridade respecto ao caso e despois de que a denuncia que interpuxo no xulgado por aqueles feitos fose arquivada.
Gonzalo Durán explicou que no seu día non publicou as imaxes das cámaras de seguridade porque a Garda Civil pediulle "que non o fixese", xa que prexudicaba a investigación e o esclarecemento dos feitos.
"Tardei un ano en facelo porque confiaba no traballo das forzas de seguridade. Agora que xa sei que non están a traballar no tema e que a causa está arquivada ese argumento xa non serve de nada, co cal o venres 13 de xaneiro farei públicas esas imaxes", resumiu.
Nelas, explicou o alcalde vilanovés, "vese perfectamente e durante bastantes segundos" andar a unha parella ao redor da súa casa. Gonzalo Durán asegurou en repetidas ocasións que vendo as imaxes esa parella "é facilmente recoñecible".
"Este é un pobo pequeno e por moito que leven a cara tapada, pola forma de andar e pola roupa que levan, coñéceselles perfectamente. Seguro que moitas persoas de Vilanova van dicir eses son 'fulano e menganita'", detallou Durán.
PERITOS CRIMINALÍSTICOS
Así mesmo, o alcalde de Vilanova tamén revelou que, "a título absolutamente persoal", contratou a unha empresa de peritos criminalísticos que levan algo máis dun mes traballando no que el definiu como "un atentado". "Unha vez que teña as conclusións das súas investigacións, achegareinas á causa", indicou.
"Todo isto non o fago só por min", continuou Gonzalo Durán, que afirmou que a hipótese coa que se está traballando é que tanto o intento de incendio da súa casa como o do seu vehículo teñen a mesma autoría. "Por tanto é un reincidente", clamou o rexedor.
"Cando unha persoa ten a patoloxía ou o vicio de prender lume a bens alleos, a próxima vítima pode ser calquera persoa que nalgún momento se cruce con eses elementos. Un día van queimar vivo a alguén e non o quero ter na miña conciencia", censurou.
COINCIDE O 'MODUS OPERANDI'
Sobre o intento de incendiar o coche do alcalde, que tivo lugar a noite do día de Reis, Gonzalo Durán indicou que a Garda Civil ten no seu poder vídeos da cámara de seguridade dun establecemento comercial situado onde estaba aparcado o vehículo nos que se ve a secuencia.
O rexedor explicou que só tivo oportunidade de ver tres segundos do vídeo do segundo incidente, pero augurou que "si que pode ser a mesma persoa" que tentou incendiarlle a casa.
MOSTRAS DE SOLIDARIEDADE
O alcalde de Vilanova de Arousa agradeceu as numerosas mostras de solidariedade que recibiu tras o incidente. Chamadas entre as que destacou as do presidente da Xunta, o delegado provincial e numerosos alcaldes, "sobre todo do PP, pero tamén doutros partidos".
