Galicia participa na creación dun circuíto itinerante de curtametraxes

Euskadi, Navarra, Galicia, Asturias e Cantabria crearon o circuíto itinerante CORTEN, para proxectar en cada comunidade autónoma aquelas curtametraxes que resulten seleccionados co obxectivo de promocionar, difundir e atopar novos públicos para as obras seleccionadas dentro dos seus respectivos catálogos cinematográficos.

Este circuíto, recentemente creado, tamén busca, tal e como explicaron os respectivos responsables institucionais, "potenciar o talento local, creando espazos de intercambio e xerando sinerxías entre os seus directores e directoras".

Trátase dun circuíto no que exhibir, con carácter anual, os novos títulos incorporados ás últimas edicións de cada catálogo. Para iso programáronse, de maneira coordinada, unha serie de pases para o público xeral nas capitais ou cidades destacadas de cada unha das comunidades participantes.

Desta maneira, as curtametraxes galegas incluídas en Shorts from Galicia terán a oportunidade de ser vistos, máis aló da súa propia comunidade, en filmotecas e salas de cinema comerciais. Ademais, os seus directores e directoras poderán presentar o seu traballo e participar en encontros profesionais.

A fórmula elixida consiste en que, durante 2023, cada comunidade autónoma organizará un evento de dous días composto por proxeccións e encontros profesionais. Os venres pola tarde proxectaranse as curtametraxes do territorio anfitrión, durante a mañá do sábado organizaranse encontros profesións con mesas redondas, master class ou networking e, pola tarde, proxectaranse as curtas das comunidades convidadas, presentadas polos seus autores e autoras.

O primeiro encontro do circuíto CORTEN será este mesmo fin de semana, os días 3 e 4 de marzo en Cantabria. Seguiralle Asturias ( 24-25 marzo), Galicia (14-15 abril); Navarra (21-22 abril) para concluír en Euskadi, os días 28 e 29 de abril.

Público nun dos pases das curtametraxes | Fonte: Organización Festival RIR