Ana Miranda e unha delegación do BNG de Ourense manteñen un encontro en Bruxelas sobre fondos europeos

A eurodeputada do BNG, Ana Miranda, e unha delegación dos nacionalistas de Ourense, encabezada polo candidato á Alcaldía, Luís Seara, mantiveron este martes unha xornada de traballo en Bruxelas sobre a captación de fondos europeos destinados ao desenvolvemento local e a revitalización do patrimonio, ante "o deixamento do actual alcalde".

Os nacionalistas ourensáns e Ana Miranda trasladaron, ante os responsables europeos, a súa preocupación pola "situación da cidade de Ourense", cun amplo centro histórico en "estado de lamentable abandono". Así, apuntou o BNG, na última década esa zona da cidade perdeu case 2.000 habitantes e máis da metade das vivendas están baleiras.

Nas reunións abordouse a posibilidade de que Ourense poida acollerse a diversos proxectos europeos, dentro do marco da Nova Bauhaus, entre outras cuestións. Segundo o candidato á Alcaldía, con estes encontros "ábrese unha vía de colaboración para o futuro".

A delegación mantivo encontros con Kieran McCarthy, relator do informe sobre a Nova Bauhaus Europea; con Michael O Conchuir, secretario xeral do grupo Alianza Europea; e con Catherine Magnant, xefa de unidade  de Política Cultural da dirección xeral de Educación, Mocidade, Deporte e Cultura.