Os salarios galegos rebaixan o seu poder de compra en case 700 euros en dous anos
O salario medio en Galicia situouse en 1.670 euros mensuais no último trimestre de 2022.
Por E.P. | SANTIAGO DE COMPOSTELA | 14/03/2023 | Actualizada ás 16:40
O poder de compra do salario medio na comunidade autónoma de Galicia baixou o equivalente a 637 euros en dous anos, segundo un informe de Adecco. De acordo co estudo, ao longo dos últimos dous anos acumuláronse diferenzas na variación do poder de compra do salario medio das distintas autonomías de ata 3.051 euros por ano.
Tal é o resultado de sumar o incremento observado en Canarias (1.919 euros/ano) coa perda rexistrada en Navarra (1.132 euros/ano). Por exemplo, a capacidade de compra do salario medio catalán gañou 1.350 euros anuais en comparación co do País Vasco, pero perdeu 1.097 euros/ano en relación co de Baleares.
Ao mesmo tempo, o poder adquisitivo da remuneración media madrileña gañou o equivalente a 180 euros/ano en comparación coa de Galicia e 396 euros con relación ao poder de compra do salario vasco, pero perdeu 63 respecto do de Andalucía e 491 euros en comparación co salario medio valenciano.
OUTROS DATOS
O salario medio español situouse no cuarto trimestre de 2022 en 1.823 euros mensuais (1.670 no caso galego), un máximo histórico, cun incremento interanual do 4,6%, pero a inflación fixo que a capacidade real de compra sexa similar á que existía en 1996, segundo as conclusións do Monitor Adecco de Oportunidades e Satisfacción no Emprego, elaborado por Adecco Group Institute e publicado este martes. O comportamento das autonomías segue a tendencia estatal, e todas as comunidades alcanzaron ao peche de 2022 o seu máximo nivel histórico.
Os soldos máis altos atópanse na Comunidade de Madrid, cun aumento interanual do 2,8%, ata os 2.135 euros mensuais, seguido do País Vasco, cun salario medio de 2.103 euros, un 2,5% máis interanual. En terceira posición sitúase Navarra, cunha remuneración de 1.969 euros ao mes, un 4,5% máis.
Cataluña tamén se sitúa por encima da media nacional, cun salario medio de 1.958 euros mensuais, cun crecemento interanual do 4,9%. Os salarios máis baixos de España, tamén en máximos históricos segundo Adecco, atópanse Extremadura, cun soldo mensual de 1.486 euros mensuais, un 4,8% máis elevado que no mesmo período do ano anterior. O incremento salarial máis importante en termos porcentuais rexistrouse en Canarias, onde os soldos subiron un 11,1% interanual no último trimestre de 2022, ata os 1.573 euros. Pola súa banda, a subida máis contida foi a da Rexión de Murcia, cun 2,8%, ata os 1.585 euros de media ao mes.
