Incautan 100k de centola e acaban na asociación benéfica Remar
Tamén había bogavantes e un boi de mar.
Por Europa Press / Redacción | SANTIAGO DE COMPOSTELA | 15/03/2023 | Actualizada ás 11:31
A Garda Civil incautou en Carballo 100 quilos de centola, dous bogavantes e un boi de mar que eran transportados de forma irregular.
En concreto, foi unha patrulla que estaba a facer un control de alcol e drogas a que realizou o achado. Ao parar un vehículo para realizarlle a proba, os axentes observaron que tiña un "comportamento nervioso", polo que examinaron a zona de carga do vehículo e localizaron varios capazos con centolas.
Os gardas civís solicitaron ao condutor a documentación que amparase o transporte desta mercadoría, ante o que achegou unicamente facturas dixitais que ía recibindo no terminal de telefonía móbil. Ante a dúbida de que a documentación achegada amparase o transporte legal do marisco, os efectivos actuantes solicitaron a presenza dunha patrulla do Seprona.
Tras personarse no lugar a patrulla, procederon a examinar os documentos achegados, certificando que a mercadoría carecía da documentación obrigatoria para o seu traslado. Por iso, os axentes incautaron o marisco, que foi entregado á Asociación benéfica de rehabilitación e reinserción Remar.
