A USC participa nun proxecto europeo de alfabetización da poboación adulta

O CiTIUS da USC contribuirá coa súa experiencia na área do Procesamento de Linguaxe Natural (PLN) á iniciativa iRead4Skills, un proxecto europeo para mellorar as capacidades das persoas adultas con baixo nivel de alfabetización

En total, serán oito as institucións europeas as que unan esforzos para mellorar este tipo de formación a través dun consorcio liderado pola Universidade Nova de Lisboa. A iniciativa, que acaba de celebrar na capital portuguesa a súa reunión de lanzamento, conta con socios de catro países (Portugal, España, Bélxica e Luxemburgo).

iRead4Skills avaliará as capacidades de lectura das persoas adultas con baixo nivel de alfabetización e desenvolverá ferramentas para tentar mellorar estas habilidades. No entanto, o obxectivo do proxecto é aínda máis ambicioso.

"Aínda que a atención céntrase nas competencias lectoras, cremos que reducir os problemas identificados neste ámbito será fundamental para que as persoas desenvolver e melloren outras competencias transversais, como a comunicación ou a capacidade para resolver problemas", afirma o investigador da USC Marcos García.

Ao longo de iRead4Skills identificarase e supervisarase a relación entre a mellora das competencias lectoras e outras, como é o caso das competencias fundamentais (aritmética ou TIC); transversais (técnicas de comunicación, traballo en equipo, linguas estranxeiras, trato co cliente, resolución de problemas, ou planificación, entre outras); e mesmo de distintas competencias xenéricas como a motivación, a cidadanía ou o benestar.