Por E.P. | SANTIAGO DE COMPOSTELA | 24/03/2023 | Actualizada ás 13:47
A Deputación da Coruña e o Concello de Santiago de Compostela compartirán o uso da Casa da Xuventude situada na Praza do Matadoiro da capital galega, un espazo que incluirá dependencias ambas as institucións, un auditorio que poderán usar os veciños e un coworking especializado en proxectos de metaverso.
O presidente da institución provincial, Valentín González Formoso, o alcalde da cidade, Xosé Sánchez Bugallo, e a edil de Urbanismo, Mercedes Rosón, deron a coñecer este venres o proxecto que prevén para este edificio, que nos últimos días protagonizou o debate na política local.
Na comparecencia, o rexedor explicou que o acordo alcanzado entre ambas as institucións, que será ratificado o luns pola xunta de goberno local, contempla que a Deputación sufrague o 74% do custo da reforma, que ascende a un total de 1,3 millóns de euros, así como os posibles sobrecustos. Pola súa banda, o Concello compostelán cede á institución provincial as instalacións por un tempo de 25 anos.
O Consistorio espera poder sacar a un concurso de ideas o proxecto canto antes. En concreto, prevé que na planta baixa se habiliten dependencias para uso da Deputación, como unha oficina de recadación, así como un auditorio con 250 butacas que poderán utilizar os veciños do Centro histórico e do barrio de San Pedro. Na primeira planta instalarase o coworking especializado en proxectos vinculados co metaverso e, na segunda, oficinas de uso do Consistorio compostelán.
O rexedor sinalou que o obxectivo é recuperar este edificio "singular" que conta con máis de 1.700 metros e que leva pechado desde a pandemia porque non reúne as condicións adecuadas para poder facelo. Segundo indicou, as actuacións requiren un esforzo orzamentario "moi grande" que o Consistorio non podía asumir, polo que decidiu "buscar socios".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.