Convocada a oitava edición do Premio de Xornalismo Científico Celia Brañas

Distingue un traballo informativo de carácter científico ou tecnolóxico, escrito ou audiovisual, publicado no último ano en calquera medio de comunicación galego.

Por Galicia Confidencial | Compostela | 27/03/2023 | Actualizada ás 11:10

Comparte esta noticia

A Real Academia Galega de Ciencias (RAGC), en colaboración coa Xunta de Galicia a través da Axencia Galega de Innovación (Gain), convoca a oitava edición do Premio de Xornalismo Científico Celia Brañas 2023. Está destinado a galardoar unha peza xornalística científica ou tecnolóxica, de carácter informativo, en formato escrito ou audiovisual, publicada ou emitida entre o 1 de maio de 2022 e o 30 de abril de 2023 en calquera medio galego (ou edición galega dun medio estatal): diarios dixitais ou en papel, radio ou televisión. O traballo xornalístico pode ser unha noticia, crónica ou reportaxe, quedando excluídas as entrevistas e os artigos. 

Supercomputador cuántico
Supercomputador cuántico | Fonte: Biogeciencias.com-Rocco Ceselin-Nature

A RAGC considera que “a ciencia e a tecnoloxía teñen actualmente un papel determinante e indiscutible no desenvolvemento económico e o benestar social dun país, polo que comunicar estes achados e as súas aplicacións á sociedade galega, así como a transferencia de coñecemento ás empresas, é unha prioridade”. Nesta liña, a Academia asegura que os medios de comunicación poden contribuír “dun xeito decisivo” a acadar este obxectivo. Para estimular esta vertente xornalística, a distinción Celia Brañas pretende recoñecer actividades de comunicación da ciencia e da tecnoloxía entre os profesionais do xornalismo dos medios de comunicación galegos.

A participación será tramitada de xeito telemático a través dun formulario electrónico dispoñible nas páxinas web da Real Academia Galega de Ciencias (www.ragc.gal) e da Axencia Galega de Innovación (http://gain.xunta.gal). Unha vez descargado e cumprimentado, o formulario enviarase por correo electrónico a pxornal@ragc.gal, acompañado da documentación complementaria sinalada nel. O prazo para presentar os traballos remata o 20 de maio.

A dotación do premio será de 3.000 euros. A maiores, concederase un accésit de 1.000 euros para o segundo traballo mellor valorado. Máis información e bases: https://www.ragc.gal/gl/premio-de-periodismo-gal/

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta