Por Galicia Confidencial | Compostela | 30/03/2023 | Actualizada ás 15:18
Xunta e Goberno central non se poñen de acordo sobre a situación económica de Galicia. Así, mentres que Madrid sinala que o país pechou 2022 cun déficit de 418 millóns, que supón o 0,6% do produto interior bruto (PIB), segundo os datos que publica este xoves o Ministerio de Facenda, o Goberno galego asegura que o PIB galego creceu un 0,4% en 2022 e houbo menos endebedamento polo que a Xunta "aforrou 201 millóns".
Segundo o ministerio, o ano anterior, 2021, Galicia rexistrou un déficit de 94 millóns (o 0,15% do PIB), polo cal a variación anual é de 324 millóns máis de déficit e 0,45 puntos máis. Mentres, o déficit do conxunto das administracións públicas (AAPP) terminou o pasado ano no 4,8% do PIB, por baixo do dato de 2021 (6,9%), e situouse en 63.776 millóns de euros, logrando mellorar o obxectivo comprometido polo Goberno con Bruxelas (5%).
Así se desprende dos datos de execución orzamentaria das administracións públicas correspondentes ao ano 2022 expostos este xoves en rolda de prensa pola ministra de Facenda e Función Pública, María Jesús Montero.
DATOS DIFERENTES
Pola contra, segundo a Xunta o PIB de Galicia creceu un 0,4% e o obxectivo do déficit situouse nun 0,6% o pasado ano. Unhas cifras que para o presidente da Xunta, Alfonso Rueda, demostran o músculo económico do país porque "hai menos débeda e menos endebedamento". De feito, presumiu de que o pasado ano, grazas a estes axustes, Galicia "aforrou 201 millóns de euros".
A Consellería de Facenda presentou este xoves un informe no Consello da Xunta que destaca a "fortaleza económica" de Galicia a pesar da crise. "Somos unha das autonomías con menos déficit", dixo Rueda ao tempo que lembrou que "é a segunda que mellor paga aos provedores; 15 días fronte aos 25 do conxunto do Estado".
O presidente da Xunta salientou que Galicia medrou un 3,8% o pasado ano fronte ao 3,5% das previsións e que se crearon 22.000 postos de traballo. Pero tamén recoñeceu que este 2023 a situación é de estancamento.
De feito, o Indicador Abanca-Foro de Conxuntura Económica de Galicia rexistrou no mes de xaneiro un incremento interanual do +1,2%. Os datos de comezo de ano confirman a contención da desaceleración da economía galega, unha vez recuperado en 2022 o nivel prepandémico. Porén, na comparación cos datos do conxunto do Estado persiste o desacople nos seus ritmos de crecemento, amosando España un mellor comportamento que Galicia.
Así, o indicador apuntaba que o inicio de 2023 non permite ser moi optimistas ao estar marcado por un contexto cheo de intercezas que afecta á confianza dos consumidores, á evolución dun sector chave como o industrial e, máis recentemente, aos mercados financeiros pola crise dos bancos e a guerra de Ucraína.
"É certo que a previsión non é a mesma que tiñamos o ano pasado polo contexto económico internacional, aínda que é moi semellante ao que vai acontecer no conxunto do Estado", dixo Rueda sobre esta nova situación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.