O Concello de Ourense lanza bonos de 100 euros para gastar no comercio e hostalaría local
Esta axuda poderase solicitar desde o día 10 de abril e ata o 10 de maio
Por Europa Press / Redacción | SANTIAGO DE COMPOSTELA | 03/04/2023 | Actualizada ás 19:27
O Concello de Ourense puxo en marcha a campaña de bonos de 100 euros para incentivar o consumo no comercio e a hostalaría da cidade que mobilizarán "100 millóns de euros". Así se deu a coñecer na presentación desta iniciativa na que participaron o alcalde, Gonzalo Pérez Jácome, o presidente da Federación de Empresarios de Hostalaría de Ourense, Ovidio Fernández, e a presidenta da Federación de Comercio de Ourense, Beatriz Gómez, que colaboraron no proceso do proxecto.
Así mesmo, asistiron representantes de todos os grupos da corporación que apoiaron por unanimidade o acordo plenario que dotou de financiamento estes bonos. "Este é un proxecto de toda a cidade de Ourense", enxalzou o rexedor, que garantiu que o obxectivo é "volver meter á xente nos comercios" e destacou a importancia de apoialos "porque hoxe en día ser empresario local é ser un heroe".
"Xóganse a súa economía todos os días ofrecendo un produto e sométense ás eleccións dos clientes cada día", subliñou Jácome antes de afirmar que "é fundamental que os negocios estean abertos, porque non só é economía, é vida". Así, o Concello de Ourense facilitará un bono de 100 euros a todas as persoas empadroadas na cidade, destinado a consumir no comercio e na hostalaría da cidade.
Esta axuda poderase solicitar desde o día 10 de abril e ata o 10 de maio, a través da páxina web do consistorio, e tamén de forma presencial solicitando cita en concello para retiralo impreso. "Non é imprescindible facelo nos primeiros días, hai bonos para toda a poboación dado o montante económico da convocatoria", expuxeron desde o goberno municipal.
En palabras do alcalde, o bono "será tremendamente fácil de consumir" porque garantiu que "non está condicionado" e funciona como un moedeiro. Así, poderase gastar todo nunha soa compra ou en varias, ademais tamén será posible utilizar o bono de varias persoas nunha mesma compra comercial ou consumición de hostalaría.
Pola súa banda, o presidente da Federación de Empresarios de Hostalaría de Ourense, Ovidio Fernández, agradeceu a iniciativa pondo de relevo "a importancia da sinerxía que se produce entre os sectores de comercio e hostalaría local" porque "xeran emprego nunha porcentaxe dun 12% do Produto Interior Bruto".
Tamén agradeceu a iniciativa a presidenta da Federación de Comercio de Ourense, Beatriz Gómez, aseverando que actividades como estas "potencian moito o consumo no pequeno comercio".
Nesta liña, lamentou que "hai unha realidade palpable" desde hai anos e "sobre todo despois da pandemia", que é o aumento do comercio en liña, polo que desde a Federación sosteñen que o bono "chama a atención de políticos e cidadáns doutras provincias" e agora "hai que sacarlle o máximo proveito para comerciante e consumidor".
A campaña xa está en marcha e o prazo de adhesión de establecementos de comercio e hostalaría, de menos de 50 traballadores, permanece aberto ata o 15 de abril. Toda a información atópase dispoñible na páxina web www.bonosourensecomercio.gal
