Infraestruturas, turismo e deporte: así investirá a Deputación de Ourense 1,1 millóns de euros

A xunta de goberno da Deputación de Ourense aprobou este luns a concesión de máis de 1,1 millóns de euros para a execución de 39 proxectos promovidos por concellos e iniciativas a desenvolver por entidades económicas, culturais, sociais e deportivas. Dese total, 19 son solicitudes de subvención, cun valor total de 666.000 euros.

Entre as axudas aprobadas neste capítulo figura unha achega para o funcionamento da Mancomunidade Turística dos concellos do Carballiño, Ribadavia, Boborás e Leiro (20.000); en Maceda contarán con axuda para a mellora do firme en Outeiro da Torre (case 48.000 euros); o arranxo da sede da Fundación Carlos Velo en Cartelle (75.000); as obras na piscina de Castrelo de Miño (48.000); e o asfaltado de rúas en Castrelo do Val (48.000 euros).

Tamén se destinarán fondos para redes de abastecemento e saneamento en Riós (máis de 81.000 euros). Con idéntica cantidade en cada caso --48.000 euros--, en Toén redactarase o proxecto para a Casa Pai Miño; en Trasmiras executarase a mellora das piscinas municipais de Vilaseca; en Veiga realizaranse obras de saneamento; e no Concello de Verea realizaranse obras na cuberta do Fogar Residencial. Outra das iniciatvias será a adquisición do inmoble que acollerá a sede da Fundación Carlos Casares (60.000), en Xinzo de Limia.

COLABORACIÓN CON ENTIDADES

Polo que respecta á colaboración con entidades, aprobáronse unha vintena de axudas por importe de 78.000 euros. En materia de promoción económica, a Confederación Empresarial de Ourense (CEO) disporá de 45.000 euros para o plan Reactiva 45 e o Consello Regulador do Ribeiro terá 60.000 euros para actualizar o seu rexistro de patrocinios.

No ámbito social, Aixiña contará con axuda para gastos de funcionamento neste ano (50.000 euros); a Fundación Gavela, que defende os dereitos das persoas con enfermidades mentais, poderá manter os seus servizos xurídicos (60.000); e a Asociación de Persoas Xordas de Ourense poderá executar un proxecto provincial (25.000).

ÁMBITO DEPORTIVO

En Deportes, A Fundación Ado Moure prol Deporte disporá de axuda para o Día da bici deste ano (12.000 euros); o Verín Club de Fútbol para gastos de funcionamento (17.500); como tamén coa mesma finalidade para o Centro de Deportes Barco (18.000) e para o Ourense Club de Fútbol SAD (50.000). A Federación Galega de Atletismo recibirá unha achega para actividades en pista cuberta (10.000) e a Escuadra Valdeorras para o V Subida a Valdeorras (20.000).

Os ámbitos da cultura e do patrimonio tamén contarán con subvencións, entre elas para gastos de funcionamento do Pen Club Galicia (25.000 euros), así como tamén co mesmo obxectivo para o instituto de Estudos Valdeorreses (13.500). A Diocese de Astorga recibirá tamén unha achega para a igrexa de Sobradelo, en Carballeda de Valdeorras (30.000).