Tres proxectos galegos estudarán o Camiño en prensa escrita, actividade comercial e textos de tradición xacobea
Por E.P. | SANTIAGO DE COMPOSTELA | 02/05/2023 | Actualizada ás 18:32
A Cátedra do Camiño de Santiago e das Peregrinacións, cuxa creación é o resultado da colaboración entre USC e Turismo de Galicia, acaba de outorgar financiamento a tres proxectos de investigación que profundan, desde diversas perspectivas, na ruta xacobea.
A análise da prensa escrita española e francesa desde o ano anterior ao primeiro Xacobeo institucional e ata 2022; o estudo da oferta da actividade comercial para turistas e peregrinos en Compostela como final do Camiño; e a recompilación de textos sobre a tradición xacobea ata o ano 1200 conforman o tres liñas de investigación a desenvolver.
O investigador Manuel Seco Lamas, da Université de Toulouse 2, acometerá, no marco da súa tese de doutoramento, o proxecto titulado 'Análise do impacto do Xacobeo no proceso de "resemántica" do Camiño de Santiago e da figura do peregrino: caso da prensa escritura nacional española (1992-2022)', no que profundará no publicado desde o ano anterior ao primeiro Xacobeo institucional e ata 2022.
Pola súa banda, Sara María Torres Outón, da Universidade de Vigo, estudará a oferta da actividade comercial e demanda dos turistas e peregrinos en Compostela, co obxectivo de coñecer "se as demandas de produtos e servizos comerciais son similares, complementarias ou están en conflito en función do tipo de consumidor".
"Este traballo persegue convidar a reflexionar sobre as consecuencias que ten na configuración das cidades e, especialmente na vida urbana, o consumo e, por tanto, a oferta comercial e de servizos básicos que sacian as necesidades de residentes, visitantes, peregrinos e turistas", explica o seu responsable.
TEXTOS DO APÓSTOLO
Finalmente, o obxectivo do proxecto de Joel Varela Rodríguez é recompilar todos os textos en torno ao Apóstolo Santiago en Compostela e as peregrinacións ao seu sepulcro, ata o ano 1200, co fin de compor "un manual útil tanto á comunidade académica como ao público xeral", explica o investigador da USC, "cunha pertinente introdución histórica e as correspondentes anotacións".
A obra porá a disposición da comunidade académica a primeira recompilación e tradución de todos estes textos, facilitando o seu acceso aos especialistas do fenómeno xacobeo cando precisen acudir a estas fontes textuais para as súas investigacións; e difundirá ante o público xeral esta colección de textos.
