O Concello de Ponte Caldelas acudirá á xustiza se a Xunta autoriza o parque eólico Serra da Fracha

O Goberno local e a Comunidade de Montes de Baltar traballarán para "defender a vida no rural".

Por Europa Press / Redacción | PONTEVEDRA | 03/05/2023 | Actualizada ás 19:07

Comparte esta noticia

O alcalde de Ponte Caldelas, Andrés Díaz, e a presidenta da Comunidade de Montes de Baltar, Marisol Boullosa, acordaron ir da man para defender os intereses dos veciños en contra do parque eólico Serra da Fracha. "Traballar en conxunto para defender a vida no rural fronte ao beneficio das empresas enerxéticas, ese é o obxectivo claro que ten o Concello de Ponte Caldelas e a Comunidade de Montes de Baltar", sinalou o Consistorio nun comunicado.

O alcalde sinalou que barallan acudir "da man" a un proceso xudicial se a Xunta autoriza este parque. "Contra o interese privado, defenderemos o noso monte, a natureza, o patrimonio, as augas e o benestar dos nosos veciños", recalcou.

O Concello de Ponte Caldelas destacou que xa elaborou o informe desfavorable da técnica de Medio Ambiente e que se está traballando noutro documento desfavorable do técnico municipal de Urbanismo. "Ambos os informes imprescindibles para acudir a un proceso xudicial no caso de que a Xunta autorice o parque eólico Serra da Fracha", sinala.

O Consistorio apunta que no caso deste parque eólico hai unha "clara afección sobre os recursos hídricos (mananciais e captacións de auga), perda do valor dos terreos, afeccións á saúde e á flora, fauna, así como á biodiversidade e á paisaxe, entre outras. "Ponte Caldelas loitará para preservar intacto o seu territorio e o futuro dos nosos fillos", subliña o alcalde.

O alcalde de Ponte Caldelas, Andrés Díaz, e a presidenta da Comunidade de Montes de Baltar, Marisol Boullosa. CONCELLO DE PONTE CALDELAS
O alcalde de Ponte Caldelas, Andrés Díaz, e a presidenta da Comunidade de Montes de Baltar, Marisol Boullosa. CONCELLO DE PONTE CALDELAS | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta