Problemas na programación diaria da CRTVG pola quinta xornada de folga
Aafecta a programas como A Revista, Atmosféricos e os deportes. O Comité Intercentros avanza que o parón afectará tamén a ZigZag e a Luar e que ten un seguemento do 70%. O ente público rebaixa a participación a un 26,1%.
Por Europa Press / Redacción | SANTIAGO DE COMPOSTELA | 12/05/2023 | Actualizada ás 13:22
A quinta xornada de folga na CRTVG afectou á programación deste venres, concretamente a programas como A Revista, Atmosféricos, os deportes e Diario Cultural, entre outros. O seguimento, segundo datos oficiais da CRTVG, é do 26,1%.
Nunha valoración a Europa Press, o presidente do comité intercentros, Tiago Alvite, sinalou que ademais dos citados, poden "certificar" que "caerá" Zigzag e Luar. En canto ao seguimento, o comité e a dirección da corporación pública difiren nas cifras. Os primeiros aseguran que, "como en xornadas pasadas", a participación no parón sitúase por encima do 70%. "Unha vez máis cae a programación non esencial, redaccións baleiras e alta participación", apunta Alvite.
A dirección da CRTVG, pola súa banda, afirma que o seguimento, na quenda de mañá, tanto en San Marcos como nas delegacións, foi do 26,1%. "O que supón que máis do 73% do persoal non secundou a folga", indican. Ademais, a corporación reafirmouse no "carácter político" destas convocatorias de folga, "máxime cando, como sinalan os escritos publicados por forzas sindicais convocantes: esta non é unha folga laboral".
17 DE MAIO
Por outra banda, a CRTVG desenvolverá desde este fin de semana unha programación especial sobre a figura de Francisco Fernández del Riego con motivo do Día das Letras Galegas 2023 a través da cal emitirá documentais, entrevistas, música e cinema en galego.
A TVG emite este sábado e domingo, e tamén o 21 de maio, os seis capítulos da webserie da Real Academia Galega 'Francisco Fernández del Riego, ou que nunca se rendeu', que se inicia nas terras de Lourenzá, onde naceu, e que abarca as súas iniciativas políticas e culturais, como viviu a Guerra Civil e a posguerra, así como o seu papel como dinamizador cultural.
