Protesta no CHUO polo traslado do Materno Infantil a espazos provisionais

Decenas de persoas, entre elas mulleres embarazadas, concentráronse este venres ás portas do Complexo Hospitalario Universitario de Ourense (CHUO) para protestar contra o traslado "a bulir" dos servizos de Materno Infantil a espazos provisionais. A mobilización foi convocada pola asociación Arrolos de Teta, que critica a falta de garantías hixiénicas, de privacidade e de planificación nesta decisión da Consellería de Sanidade, especialmente cando as deficiencias no edificio xa eran coñecidas antes do desprendemento dun teito en marzo.

Durante a protesta, o director asistencial do CHUO, Eloy Sánchez, recibiu ás representantes da asociación e guiounas nunha visita polos espazos provisionais. Alí, confirmouse que non haberá sala de parto natural e que o equipamento é limitado, malia recoñecerse que a situación é “temporal” sen fixar prazos concretos. Ayelén Fonseca, embarazada e membro do colectivo, transmitiu a súa "angustia" ante a incerteza sobre as condicións do parto e a posibilidade de non poder estar acompañada. Algunhas pacientes xa valoran dar a luz noutros centros ou en clínicas privadas.

Pola súa banda, a Xerencia da área sanitaria defendeu a medida como unha “mellora incuestionable” respecto á situación actual. Aseguran que o novo espazo, situado na unidade de cirurxía maior ambulatoria, contará con acceso independente, dúas salas de parto, áreas pechadas e posibilidades de expansión. Con todo, Arrolos de Teta mantén a súa oposición e anuncia unha nova concentración o luns para continuar coa súa reivindicación.