Rajoy: " As leis de benestar animal, trans e si é si son ridículas, grotescas e absurdas"
O candidato popular á alcaldía de Pontevedra comprométese a retirarlle o nomeamento de persoa "non grata"
Por Europa Press / Redacción | Pontevedra | 14/05/2023 | Actualizada ás 12:21
O presidente de honra do PP, Mariano Rajoy, asegurou en Pontevedra que "o principal problema que ten España nestes momentos é a existencia dun goberno Frankenstein", responsable de "leis ridículas, grotescas e absurdas" como a de benestar animal, 'trans' e 'só si é si' e que tivo como "consecuencias" a "liquidación do delito de sedición" e "a baixada de penas por malversación".
En Pontevedra, durante a súa intervención nun mitin co candidato á alcaldía de Pontevedra, Rafa Domínguez, na Praza da Estrela; o expresidente do Goberno aseverou que estas leis aprobadas polo executivo de coalición entre PSOE e Unidas Podemos son "un dos maiores disparates" que viu na súa vida política.
En pleno centro da cidade na que creceu, o presidente honorario do PP criticou que o actual rexedor pontevedrés, Miguel Anxo Fernández Lores (BNG), declarase que as persoas de dereitas "vótanlle por ser felices", xa que, ao seu xuízo, os votos ao candidato nacionalista van "ao goberno Frankenstein" do PSOE, que "pacta co mellor de cada casa, incluíndo independentistas, radicais ou o brazo político dos terroristas".
Nese sentido, rexeitou a presenza de 44 "terroristas de ETA nas listas de Bildu que apoian a ese goberno do Bloque, Podemos e PSOE", engadiu Rajoy. Pola contra, asegurou que o PP goza "dunha saúde magnífica" a pesar de ter atravesado "momentos difíciles" que, di, superou para ser na actualidade "unha sigla prestigiada".
