'Allariz é un mundo': campaña para coñecer Vicente Risco e Allariz dende a hostalería local
O Concello de Allariz, en colaboración coa Fundación Vicente Risco, vén de presentar unha campaña de divulgación cultural e turística en gardamanteis para a hostalería local.
Por Galicia Confidencial | Allariz | 18/05/2023 | Actualizada ás 09:00
A campaña #AllarizéUnMundo pretende divulgar a figura de Vicente Risco e promover a visita a súa Fundación en Allariz así coma o coñecemento do noso municipio mediante pasatempos e a promoción da XIII edición do festival Internacional de Xardíns de Allariz coa súa temática deste ano “A volta ao mundo en 11 xardíns”.
A frase “Galicia é un mundo” de Vicente Risco cóllese prestada para crear o lema da campaña, ”Allariz é un mundo”, e así achegar á cidadanía as iniciativas da fundación e outras que promove o concello a nivel cultural e turístico.
CAMPAÑA EN COLABORACIÓN
A campaña consiste na impresión de 20.000 gardamanteis individuais, dun só uso, coa imaxe dun mapa de Allariz e os puntos de interese ademais dun pasatempo vinculado ao tema. A maiores, pódese atopar neles información e horarios da fundación Vicente Risco e do Festival Internacional de Xardíns deste 2023.
O material foi presentado o pasado luns 15 de maio nun acto onde Celia Porto, Presidenta da Fundación Vicente Risco, e María López, Concelleira de Promoción económica, Turismo e comercio de Allariz, destacaron a importancia deste tipo de colaboracións entre os distintos actores que operan no territorio para realizar accións que axuden a dinamizar o municipio e difundir a nosa cultura.
Esta iniciativa pon de manifesto a importancia da colaboración público privada co obxectivo principal de aproveitar este soporte nas mesas da hostalería local para promover a imaxe de Allariz e de dous dos seus atractivos como son a Fundación Vicente Risco e o Festival Internacional de Xardíns.
Dende o concello informan que os establecementos poden recoller os seus gardamanteis de balde ata que se rematen as existencias.
