Navantia estuda "posibles emprazamentos estratéxicos" de cara o futuro da eólica mariña
Desde o ámbito político falouse dun posible traslado da empresa ao porto exterior da Coruña en Punta Langosteira.
Por Europa Press / Redacción | Ferrol | 19/05/2023 | Actualizada ás 12:40
A empresa naval pública Navantia asegura que analiza "posibles emprazamentos estratéxicos" ante a previsión de crecemento do sector da eólica mariña e que estas instalacións serían complementarias aos seus actuais centros de fabricación e montaxe tanto de Fene como de Puerto Real.
Fontes consultadas por Europa Press detallaron que a previsión de "crecemento exponencial da eólica mariña en Europa en xeral e en España, e as necesidades derivadas do aumento do tamaño dos compoñentes dos futuros parques eólicos", motivan o que se estea estudando novos emprazamentos para o ensamblado final de compoñentes.
Desta maneira, a empresa pertencente á Sociedade Estatal de Participacións Industriais (SEPI), quixo saír ao paso dalgunhas manifestacións chegadas do ámbito político e que daban por seguro un traslado da empresa pública ao porto exterior da Coruña, concretamente a Punta Langosteira.
Fontes consultadas aseguraron que "unha vez encaixadas nos plans de negocio da compañía, e se fosen obtidas as concesións definitivas", estas "serían operadas caso a caso por Navantia, e os seus actuais socios e colaboradores neste negocio, contribuíndo a incrementar a capacidade nacional de fabricación de compoñentes para parques eólicos mariños".
