Así queda o mapa político nas grandes cidades galegas

O PP gobernará Ferrol e os pactos permitirán ao PSdeG conservar A Coruña e Lugo e ao BNG facerse con Santiago. A gran incognita é, novamente, Ourense, logo de que Jácome arrasara aos seus rivais a pesar dos audios.

Por Europa Press / Redacción | Santiago de Compostela | 28/05/2023 | Actualizada ás 23:39

Comparte esta noticia

O PP gobernará Ferrol con maioría absoluta, mentres que serán necesarias alianzas postelectorales para que o PSdeG poida conservar A Coruña e Lugo e o BNG facerse coa Alcaldía de Santiago de Compostela tras as eleccións municipais deste 28 de maio.

A situación máis imprevisible rexistrouse en Ourense, onde Democracia Ourensá, de Gonzalo Pérez Jácome, logrou converterse na forza máis votada, con dez concelleiros, a pesar das diversas polémicas nas que o alcalde se viu envolvido ao longo do seu mandato e a que nas últimas semanas transcenderon audios que o implicarían en supostas prácticas irregulares e que xa están xudicializados.

Esta condición de lista máis votada de Democracia Ourensá obrigaría a pactar ao PP, con sete concelleiros, ao PSdeG, con seis edís, e ao BNG, con catro, para acantoar a Jácome, a condición de que, ademais, os candidatos popular e socialista manteñan a súa palabra de non pactar con Democracia Ourensá.

En Vigo, o socialista Abel Caballero conserva a súa folgada maioría absoluta, aínda que sofre un desgaste dun edil, que o deixa nos 19. O PP logra unha acta máis, ao pasar a ter cinco concelleiros, e o BNG sobe de só un posto a tres. Desaparece da corporación vigesa Marea de Vigo, que nestas eleccións presentábase con Podemos na súa papeleta.

Onde tamén se cumpriu o guión foi en Pontevedra, porque aínda que os populares logran ser a forza máis votada, ao subir de nove a 11 edís, o nacionalista Miguel Anxo Fernández Lores poderá seguir gobernando co apoio dos socialistas. Así, o modelo urbano do BNG nesa cidade acusa un desgaste de apoio ao pasar de once a nove concelleiros, pero os nacionalistas poderán reter a alcaldía que ocupan desde 1999 co apoio dos socialistas, que soben un concelleiro ata o cinco.

En Lugo, A socialista Lara Méndez poderá reter o bastón de mando apoiándose no BNG, tras repetir ambas as formacións o mesmo número de escanos que xa cultivaran nas anteriores municipais: oito edís PSdeG e cinco o Bloque. O PP sobe de dez a doce concelleiros á conta de Cs, que desaparece da corporación.

Na Coruña, a socialista Inés Rey poderá reter a alcaldía tras subir de nove a 11 concelleiros, pero necesitará o respaldo do BNG, que duplica a súa representación en María Pita, ao pasar de dous a catro actas. Mentres o PP retén a condición de lista máis votada e logra tres edís máis, ata os 12 asentos, desaparecen da corporación Marea Atlántica e Cs.

En Santiago, o BNG sacoulle máis de 900 votos ao PSdeG, aínda que empataron a seis edís. A nacionalista Goretti Sanmartín podería converterse na primeira alcaldesa da capital de Galicia se suma o apoio de socialistas e Compostela Aberta, que baixa de cinco a dous edís. De fraguarse esa alianza a tres, de nada servirá ao PP lograr ser a lista máis votada, con once concelleiros, a dous da maioría absoluta.

En Ferrol, o popular José Manuel Rei Varela, exconselleiro e alcalde entre 2011 e 2015, volve á alcaldía con maioría absoluta e desbanca ao socialista Ángel Mato, que baixa de oito a sete concelleiros. Tamén baixa Ferrol en Común, de tres a dous concelleiros, mentres que o BNG sobe de dous a tres edís.

Mapa de partidos nas eleccións municipais 28M de 2023
Mapa de partidos nas eleccións municipais 28M de 2023

MAREAS, Cs e VOX

As mareas, que en 2015 lograran facerse coas alcaldías da Coruña, Santiago e Ferrol, quedan aínda máis tocadas ao só conservar representación nestas dúas últimas cidades. A esquerda rupturista desaparece do Concello herculino, onde concorría dividida entre Marea Atlántica e Por Coruña, un partido próximo a Podemos e a Sumar, e tampouco obtén representación Marea de Vigo, que nestas eleccións levaba na súa papeleta a marca Podemos.

Ci, que en 2019 lograra concelleiros na Coruña, en Lugo, en Ourense e en Pontevedra, desaparece de todas as corporacións das grandes cidades galegas, onde segue sen estar Vox. Pero os de Santiago Abascal si conseguen nestas municipais o seu primeiro representante en Galicia, que será no concello ourensán de Avión.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Gamela

O de Jácome é digno de estudo (o PSOE de Villarino perdeu 7.820 persoas en Ourense) E mira que pasamos 4 anos tocando as pelotas ! https://resultados.locales2023.es/r... O populismo é o que tén, que lle gusta a moita xente, senon mirade a desgracia de Vigo !