Un recurso electoral atrasa o pleno de constitución da nova corporación de Celanova ata o 7 e xullo

A celebración do pleno de constitución da nova corporación local no Concello de Celanova postergarase ata o 7 de xullo, segundo explicou o rexedor en funcións e candidato de Celanova Decide, Antonio Puga. Esta forza política pediu á Xunta Electoral Central o adiamento como medida cautelar ante o recurso contencioso electoral que formulou a pasada semana no Tribunal Superior de Xustiza de Galicia (TSXG), a través da Xunta Electoral de Zona.

O motivo foi un erro na transmisión telemática dos resultados da mesa de Acevedo do Río a noite dos comicios electorais do pasado 28 de maio. Intercambiáronse as cifras dos votos recibidas entre Celanova Decide e o Partido Socialista, polo que non se corresponde co escrutinio da acta asinada na mesa. O rexedor municipal en funcións explicou que a incidencia se coñeceu esa mesma noite e que ao día seguinte el e a secretaria do concello trasladárono á xunta electoral porque o reconto afecta a repartición de edís.

No escrutinio serían 5 concelleiros para o Partido Popular, outros 5 para Celanova Decide, 1 para o Bloque Nacionalista Galego e 2 para o PSdeG. Con todo, debido ao erro nesa mesa, os resultados atribúenlle 6 ao Partido Popular, o que permitiría gobernar en minoría se o BNG non decidise apoiar un pacto con Celanova Decide e o Partido Socialista, que xa se entenderon ao longo deste últimos catro anos.

O rexedor en funcións confía en que o tribunal emende o erro porque, sinala, "os resultados reais son os recolleitos nas actas dos escrutinios asinados polo presidente de mesa, os vogais e os interventores". Así, o Tribunal Superior de Xustiza de Galicia atópase en fase de prazo de alegacións polas outras partes que poidan estar personadas, ademais do Ministerio Fiscal.

Urna nun colexio Electoral | Fonte: Víctor Fernández - Europa Press