Creado un novo consorcio europeo para desenvolver vacinas nasais no que participa o CiMUS da USC
Tal como informou o centro universitario, as infeccións respiratorias bacterianas e virais contribúen significativamente á morbilidade e mortalidade global.
Por E.P. | SANTIAGO DE COMPOSTELA | 14/06/2023 | Actualizada ás 20:03
O Centro Singular de Investigación en Medicamento Molecular e Enfermidades Crónicas (CiMUS) da Universidade de Santiago de Compostela (USC) participa no novo consorcio europeo para o desenvolvemento de vacinas nasais, denominado Nosevac.
Tal como informou o centro universitario, as infeccións respiratorias bacterianas e virais contribúen significativamente á morbilidade e mortalidade global, polo que para combater estes problemas creouse Nosevac, no que participa a USC a través dos grupos que dirixen Noémi Csaba e María José Alonso.
Así, durante o próximos cinco anos o consorcio traballará para crear vacinas nasais combinadas, dirixidas ás infeccións respiratorias máis agresivas, ademais de desenvolver dúas vacinas bivalentes (que contén dous tipos de antígenos diferentes para dúas cepas do virus) para previr o Covid-19.
"Ata agora, as vacinas dispoñibles contra estas enfermidades adminístranse por inxección intramuscular ou subcutánea e non preveñen eficazmente a colonización do tracto respiratorio superior", explicou a investigadora Csaba, indicando que, como consecuencia, o seu impacto na transmisión de patógenos é limitado.
Nosevac estará coordinado pola Iniciativa Europea de Vacinas e traballará no deseño e avaliación de plataformas de vacinas nasais como un enfoque innovador para previr a etapa máis temperá da infección, inhibindo así a colonización, transmisión e enfermidade do tracto respiratorio superior.
