Denunciado un condutor de guindastre por dar positivo en drogas cando acudiu a auxiliar a outro coche
Por Europa Press / Redacción | SANTIAGO DE COMPOSTELA | 16/06/2023 | Actualizada ás 10:42
A Garda Civil denunciou a un condutor de guindastre, de 34 anos de idade e veciño de Pontevedra, tras dar positivo en THC cando se lle requiriu que acudise ao lugar dun accidente na AP-9 para retirar un vehículo.
Ocorreu na tarde do mércores, día 14 de xuño, cando unha patrulla do Destacamento de Tráfico de Vilaboa se atopa auxiliando ao condutor do coche que sufriu o sinistro no quilómetro 144,800, en sentido A Coruña. A vítima acabou derivada a un centro hospitalario.
Dúas horas máis tarde de que fose solicitado o servizo de guindastre, presentouse este vehículo. Segundo relata a Garda Civil, o seu condutor, un pontevedrés de 34 anos, presentaba "síntomas de poder atoparse baixo os efectos dalgunha sustancia psicotrópica".
Así, as probas practicadas deron positivo indiciario en THC, que aínda está pendente de confirmación a través de laboratorio. De ratificarse, o home podería enfrontarse a unha sanción de 1.000 euros (500 se hai pronto pago), así como á retirada de seis puntos do permiso de conducir. A Garda Civil procedeu a inmobilizar o guindastre ata que acudiu ao lugar outro empregado da empresa para facerse cargo.
