Por E.P. | SANTIAGO DE COMPOSTELA | 26/06/2023 | Actualizada ás 18:04
O conselleiro de Sanidade, Julio García Comesaña, participou este luns no I Foro de Nutrición de Galicia, un encontro no que destacou as máis de 80.000 consultas realizadas no que vai de ano polos 94 especialistas en nutrición que o Sergas incorporou a Atención Primaria.
A Consellería de Sanidade acolleu o acto, no que se presentou un novo protocolo de coordinación desta especialidade, que permitirá a comunicación directa entre os centros de Atención Primaria, as consultas de endocrinoloxía dos hospitais, e a Rede de Unidade de Apoio Nutricional.
"Este modelo permitirá a apertura dunha vía de comunicación directa entre os servizos de endocrinoloxía do sete áreas sanitarias, e as unidades de nutrición de Atención Primaria", explicou García Comesaña, á vez que subliñou que este traballo colaborativo "aumentará a capacidade de resolución" dos servizos de endocrinoloxía en ambos os niveis asistenciais.
Durante o foro, o conselleiro agradeceu o labor que desempeñan a diario os novos nutricionistas e os servizos de endocrinoloxía da rede sanitaria pública galega. Así, destacou que a súa incorporación xa está a mostrar "os seus efectos positivos" no sistema público de saúde.
Por outra banda, García Comesaña puxo en valor o bo funcionamento do programa de fomento de estilos de vida saudables da Xunta, o 'Plan Obesidade Zero', que desde a súa posta en marcha xa permitiu crear a Rede Galega Local de Promoción da Saúde; ou o programa 'Adestra a túa saúde', cuxo pilotaxe xa esta conectando os centros de atención primaria co persoal promotor de exercicio dos concellos galegos.
Nesta liña, o responsable da carteira sanitaria tamén lembrou a importancia doutras iniciativas pioneiras no campo da dietética e da nutrición, como é o caso do 'Proxecto Nutriescolas', e co que a Xunta leva a boa alimentación aos comedores dos centros educativos galegos.
"A nutrición eríxese como unha aposta de futuro por conseguir unha Galicia máis saudable", dixo García Comesaña, á vez que convidou á poboación galega a levar un modelo de vida saudable no que a alimentación sa se conjugue coa realización dalgunha actividade física de maneira regular.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.