Os polígonos agroforestais de Oímbra e Cualedro en Ourense saen a exposición pública
As datas de sometemento a exposición pública serán dende o xoves seis de xullo ata o tres de agosto
Por E.P. | SANTIAGO DE COMPOSTELA | 05/07/2023 | Actualizada ás 12:38
A Xunta someterá, dende este xoves ata o 3 de agosto, a exposición pública os polígonos agroforestais de Oímbra e Cualedro, na provincia de Ourense. No Diario Oficial de Galicia (DOG) publicou este mércores o anuncio destes proxectos que se enmarcan dentro da Lei de recuperación da terra agraria de Galicia e suporán a mobilización en conxunto, de máis de 85 hectáreas.
Segundo informou o Executivo galego, o polígono de Oímbra conta con 21,76 hectáreas de terreo divididas en 72 parcelas de 73 propietarios e o de Cualedro agrupa un total de 64 hectáreas de terreo correspondentes a 72 predios que contan con 70 titulares.
Así, especificou que, ao tratase de polígonos de iniciativa pública, o obxectivo principal é pór en produción áreas de terra agroforestal con boa capacidade produtiva que se atopan en estado de abandono ou infrautilización, e recuperar así a actividade agrícola ou forestal.
No polígono de Oímbra o uso planificado é principalmente o de cultivo leñoso, como viñedo, e hortícola, principalmente o pemento. Ademais, contempla a posibilidade de poder establecer un aproveitamento gandeiro en extensivo. O polígono agroforestal de Cualedro destaca polo uso principal da gandaría en extensivo e os cultivos agrícolas, principalmente complementarios para o aproveitamento gandeiro, pero tamén doutras variedades.
