Un xulgado obriga a Froiz a readmitir "inmediatamente" a unha traballadora tras declarar nulo o seu despedimento
Denegoulle a adaptación do posto de traballo ás súas limitacións físicas.
Por Europa Press / Redacción | SANTIAGO DE COMPOSTELA | 07/07/2023 | Actualizada ás 14:55
O xulgado do social número 4 da Coruña estima a demanda dunha traballadora contra Distribucións Froiz e declara nulo o despedimento de que foi obxecto o pasado ano. Así, condena á empresa a que a readmita "inmediatamente" con abono dos salarios deixados de percibir.
Ademais, o xulgado tamén condena á compañía demandada ao abono á traballadora dunha indemnización de 7.501 euros por razón de vulneración do dereito á non discriminación por razón de discapacidade. E é que, segundo destaca a CIG nun comunicado, Froiz terá que readmitila despois de denegarlle a adaptación do posto de traballo ás súas limitacións físicas.
A traballadora prestaba servizos na sección de carnicería e foi diagnosticada de tendinite de Quervain. Os informes da mutua e os da Seguridade Social desaconsellaban movementos repetitivos, pero a empresa "fixo caso omiso", critica a central nacionalista. Pouco despois de solicitar ela o cambio de posto á sección de frutería, Froiz decidiu despedila por motivos disciplinarios alegando "unha baixada de rendemento".
