Detectado en Ourense un caso de botulismo por consumo dunha tortilla de patacas envasada

Un dos catro casos confirmados en España de botulismo relacionado presuntamente co consumo dunha tortilla de patacas envasada correspóndese a un home de 48 anos de idade que estivo ingresado durante dúas semanas no Hospital de Ourense, con dez días na UCI e que foi dado de alta este luns.

Segundo informaron desde a área sanitaria ourensá, unha vez detectado o caso, a inicios do mes de xullo, o Servizo de Medicina Preventiva da área Sanitaria de Ourense levou a cabo unha investigación epidemiolóxica para establecer a orixe e notificou á Consellería de Sanidade o caso, dado que é unha enfermidade de declaración obrigatoria urxente.

Tras a notificación ao Sistema Nacional de Alertas de Saúde Pública do Ministerio de Sanidade tívose coñecemento da confirmación de catro casos, e outros dous probables, en distintas comunidades autónomas.

A investigación epidemiolóxica estableceu un probable vínculo co consumo dunha tortilla envasada, para a que a Axencia Española de Seguridade Alimentaria xa emitiu unha alerta sanitaria. Sanidade procedeu a inmobilizar os lotes almacenados deste produto.

O botulismo é unha enfermidade grave pero relativamente infrecuente causada por toxinas producidas por 'Clostridium botulinum'. Existen tres formas clínicas de botulismo: a forma clásica ou botulismo transmitido por alimentos, o botulismo intestinal e o botulismo por feridas. Todos eles dan lugar a parálise flácida pola acción da neurotoxina botulínica na unión neuromuscular.

O ministerio de Sanidade informou de que os casos confirmados correspóndense cunha muller de 23 anos e o seu pai de 61 que regresaron a Italia dende Valladolid o 1 de xullo consumindo a tortilla envasada o 30 de xuño e que iniciaron os síntomas o un e dous deste mes. Os outros dous casos residen en España, concretamente en Ourense e Asturias e trátase de dous homes de 49 e 50 anos que consumiron a tortilla o 19 de xuño e o 5 de xullo. Ambos requiriron tratamento nunha Unidade de Coidados Intensivos.

Ademias foron notificados tres casos probables pola Comunidade Valenciana, a Comunidade de Madrid e Andalucía, en tres persoas de 43, 49 e 27 anos que iniciaron síntomas o 21 de xuño, 10 de xullo e 1 de xullo respectivamente e con consumo de entre o 19 e o 5 de xullo. A persoa residente en Madrid requiriu tratamento nunha UCI. Polo momento non houbo ningún falecidoo entre os casos asociados a este brote.

SÍNTOMAS

O Ministerio de Sanidade lembrou que case todos os casos esporádicos e brotes teñen relación con produtos alimentarios preparados ou conservados por métodos que non destrúen as esporas e permiten a formación de toxina, habitualmente conservas caseiras.

Os síntomas do botulismo inícianse de forma aguda tras un período de incubación habitual de 12-36 horas, aínda que ás veces pode chegar a ser de varios días e ata 1 semana tras a inxesta do alimento. Canto máis curto é o período de incubación máis grave é a enfermidade e maior a letalidade. A clínica consiste nunha neuropatía bilateral asociada a unha parálise ou debilidade simétrica descendente flácida producida pola acción da neurotoxina botulínica.

No botulismo transmitido por alimentos, aínda que a persoa pode presentar síntomas gastrointestinales como náuseas, vómitos ou diarrea, os síntomas iniciais son unha marcada astenia, debilidade e vertixe seguidos de visión borrosa, boca seca, dificultade para tragar e para falar como consecuencia da afectación pola toxina dos pares craniais. A parálise dos músculos respiratorios pode requirir a instauración de ventilación mecánica. A maioría dos casos recupéranse se son diagnosticados e tratados precozmente.

GRUPO PALACIOS

O Grupo Palacios Alimentación decidiu retirar de forma voluntaria e por precaución os seus produtos de tortilla de pataca envasada, despois de que se asociaran a varios casos de botulismo. A empresa indicou que adoptou "todas as medidas necesarias para detectar unha posible causa", a pesar de que as instalacións da fábrica na que se produce o prato, que detivo temporalmente a súa fabricación, foron inspeccionadas ata en catro ocasións recibindo un resultado "favorable" por parte das autoridades sanitarias.

Aínda que a Axencia Española de Seguridade Alimentario e Nutrición (AESAN) "non puido establecer unha evidencia, nin nos produtos nin nos procesos, que relacionen causa efecto", o grupo empresarial solicitou aos consumidores que adquirisen un destes produtos que se absteñan de consumilo e devólvano ao punto de venda no que o adquiriron para que reciban un reembolso do importe.

Así mesmo, a compañía subliñou que a seguridade alimentaria é "prioritaria" para o grupo empresarial, que leva a cabo de maneira regular análise de control. Con todo, Palacios Alimentación, que pediu desculpas aos seus clientes polas molestias, aseverou que está a colaborar coas autoridades sanitarias "para aclarar este episodio canto antes".