Facenda anuncia que recibiu os Next Generation de 2021 "nos últimos meses do ano" e pode executalos até 2026
"É necesario salientar que cos datos de execución actuais, os fondos REACT-EU van quedar totalmente executados a finais do 2023", segundo trasladan fontes da Consellería de Facenda.
Por Europa Press / Redacción | SANTIAGO DE COMPOSTELA | 28/07/2023 | Actualizada ás 19:26
A Consellería de Facenda destaca que recibiu os fondos Next Generation de 2021 "nos últimos meses do ano", o que "dificultou a súa execución". No entanto, lembra que estes fondos se poden seguir executando ata 2026. "Por tanto, estes recursos nin se perden nin se deixan de executar", agrega.
Así responde o informe de Contas que apunta a Xunta executou 126 millóns dos denominados fondos Next Generation en 2021, o 26,2% dos créditos existentes nese exercicio, aínda que o órgano fiscalizador xa facía mención a que a Xunta xustifica estas baixas taxas de execución na "tardía" repartición dos fondos acordado polo Ministerio de Facenda ás comunidades.
O informe de Contas apunta que a Xunta percibiu 539 millóns correspondentes cos fondos REACT-EU e os fondos do Mecanismo Europeo de Recuperación e Resiliencia (MRR), a partir dos que habilitou créditos no orzamento de gasto por 480,5 millóns, coa citada execución de 126 millóns.
"É necesario salientar que cos datos de execución actuais, os fondos REACT-EU van quedar totalmente executados a finais do 2023", segundo trasladan fontes da Consellería de Facenda a Europa Press.
Ademais, a Xunta remarca que adxudicou no primeiro semestre o 70% dos 527 millóns dos fondos do Mecanismo de Recuperación e Resiliencia (MRR) previstos no orzamento inicial para 2023, é dicir, 370 millóns.
"Os recursos do MRR asignados polo Goberno central á Administración galega para o desenvolvemento de políticas públicas ascenden a 1.384 millóns de euros, dos cales Galicia ingresou 1.207 millóns de euros", relata este departamento. "Con todo, desde a posta en marcha do Plan de Recuperación a Xunta publicou convocatorias por máis de 893 millóns de euros, dos que se adxudicou preto do 69% (616 millóns de euros)", explica.
Segundo cifra, preto de 33.000 persoas físicas, 7.300 autónomos, máis de 2.700 empresas e 200 entidades locais víronse favorecidos dos fondos de recuperación xestionados pola Administración galega.
