Afastase a idea dun goberno de coalición en Pontevedra tras impor o PSdeG varias mocións co apoio do PPdeG
Foi nunha sesión plenaria con cruzamento de críticas entre socialistas e nacionalistas.
Por Europa Press / Redacción | SANTIAGO DE COMPOSTELA | 31/07/2023 | Actualizada ás 16:40
O pleno do Concello de Pontevedra aprobou, cos votos a favor do Partido Popular e o Partido Socialista, a reapertura ao tráfico da avenida Reina Vitoria, así como a substitución dos pasos sobreelevados nas vías sanitarias.
Foi nunha sesión plenaria que deixou patente a debilidade na que se atopa o goberno local do BNG que viu como a pinza formada polos dous grupos da oposición, Partido Popular e Partido Socialista, impuxo algunhas medidas fronte ás que os nacionalistas están radicalmente en contra.
"Imos ter un mandato entretido, esperemos que divertido", apuntou o concelleiro nacionalista, César Mosquera que asegurou que con esta actitude "o PSOE ten decidido non facer un goberno de coalición" polo que aventurou que este mandato "probablemente vaia a moción de censura".
O portavoz do grupo municipal socialista, Iván Puentes, rexeitou que aspire a "converter nunha relación de Pimpinela" os plenos, as negociacións co Bloque, "nin o futuro goberno de coalición se se dese o caso".
Así, criticou que, desde que o PSOE "con toda a xenerosidade do mundo" apoiou a investidura de Miguel Anxo Fernández Lores como alcalde de Pontevedra, o goberno local do BNG dedicouse a "porlle fin a practicamente todas iniciativas que o Partido Socialista desenvolveu nas súas concellarías nos últimos anos".
O portavoz do grupo municipal do Partido Popular, Rafa Domínguez animou ao PSOE a "que esta posición que traen aquí ao pleno de Pontevedra, entren ou non entren no goberno, a manteñan".
MOCIÓNS
En canto aos asuntos aprobados, ambos presentáronse na orde do día como mocións defendidas polo PSOE que foron apoiadas polo PP. Foron 16 votos a favor -- once dos populares e cinco dos socialistas-- e nove en contra do BNG.
En virtude do acordado na sesión plenaria deste luns, a corporación municipal de Pontevedra insta o goberno local a iniciar os traballos para a redacción do proxecto de humanización, reforma e usos da avenida Reina Vitoria Eugenia. Este proxecto deberá incluír a transformación de todo o espazo nunha rúa de plataforma única con preferencia peonil.
