As granxas de leite de Pontevedra perderán 20 millóns de euros pola baixada do prezo de compra ao produtor

Unións Agrarias (UU.AA.) cifrou en 20,2 millóns de euros a cantidade que as explotacións de leite de Pontevedra deixarán de ingresar este ano a consecuencia das reiteradas baixadas de prezo impostas polas industrias que provocaron que a cifra media que os gandeiros galegos perciben por litro de leite se sitúe nos 0,48 euros.

O 45 % da produción do leite en España parte de Galicia. Na provincia de Pontevedra rexístranse 720 explotacións, que producen 280.000 toneladas anuais de leite, segundo os datos facilitados este mércores en rolda de prensa por Félix Porto, secretario de Coordinación Sectorial e Área Externa de Unións Agrarias, e Javier Iglesias, responsable provincial desta organización sindical.

Este sindicato advertiu de que a redución de tarifas de máis de 10 céntimos por litro de leite "impostas de maneira unilateral polas industrias" que as granxas tiveron que aceptar, primeiro en abril e agora de novo neste mes de agosto, suporá "unha caída de ingresos imposta sen xustificación de mercado e á marxe das obrigacións que estipula a Lei de Cadea Alimentaria". Unións Agrarias denunciará esta situación ante a Comisión Nacional dos Mercados e da Competencia e ante a Axencia de Información e Control Alimentarios.

Aseguran que estas sucesivas rebaixas "prodúcense sen que exista ningunha razón de mercado que as avale" e "totalmente á marxe da evolución dos custos dos insumos", polo que entenden que "na práctica supón obrigar ás explotacións a cobrar por baixo de custos de produción".

Afirman que "as industrias están a actuar como un cártel organizado" para adaptar o mercado ás súas necesidades e incrementar as súas contas de beneficios "á marxe da legalidade" e da evolución do mesmo. A este feito, sumaron á "resistencia" das industrias a negociar contratos e os "reiterados incumprimentos". Por este motivo, en setembro iniciarán unha campaña de recollida de firmas e realizarán protestas.

VACINACIÓN DA LINGUA AZUL

Nesta mesma rolda de prensa Unións Agrarias destacou o "bloqueo" que a "paralización" da campaña de vacinación de lingua azul está a supor nas explotacións galegas. Félix Porto e Javier Iglesias pediron á Xunta de Galicia unha campaña de vacinación para aqueles exemplares que non se puideron vacinar para facer fronte a esta enfermidade cando tiñan menos de tres meses e agora atópanse en etapa de comercialización, xerando unha carga para as explotacións galegas ao quedar fóra do mercado.