"As touradas en Pontevedra, ao lixo", a nova campaña contra a tauromaquia
Por Europa Press / Redacción | PONTEVEDRA | 03/08/2023 | Actualizada ás 12:08
A plataforma Galicia, Mellor Sen Touradas impulsou unha campaña visual que anima a "tirar ao lixo" a tauromaquia en Pontevedra, dando as costas a unha actividade que consideran "ultraminoritaria e inédita" en toda a Comunidade.
Segundo lamentan nun comunicado, Pontevedra é o único municipio con corridas de touros en Galicia, despois de que A Coruña deixase de subvencionalas en 2015 e de que diferentes localidades renunciasen á súa organización ante as perdas económicas que supuña a súa promoción e falta de público.
"Non obstante todas as enquisas de hábitos e prácticas culturais elaboradas polo Ministerio de Cultura evidencian que a afección real á tauromaquia é inferior ao 1% da poboación galega e nin con medidas como a inclusión das corridas no Bono Cultural Mozo existe unha substitución xeracional real", engadiu a organización.
Os abolicionistas lembraron que os promotores na cidade do Lérez aínda contan cun convenio de arrendamento do coso, que lles permite obter cada ano decenas de miles de euros do erario público mentres manteñen o recinto nun estado próximo ao abandono.
"Esta situación constátase ano tras ano. Só se abarrota a praza para actividades puntuais como a Feira Franca ou para dúas corridas de touros, permanecendo o equipamento sen emprego real o resto do ano e sen que o Concello asumise o estudo da súa potencial expropiación para crear un polo de atracción sociocultural decente", criticaron.
