Axudas para a difusión e fomento do uso do software e o hardware libre en Galicia

A Axencia para a Modernización Tecnolóxica de Galicia abriu a convocatoria de axudas para a realización de proxectos que teñan por obxectivo a realización de actividades de difusión e fomento do uso do software e hardware libre en Galicia, segundo publica este luns o Diario Oficial de Galicia (DOG). Esta convocatoria de carácter bienal comprende as anualidades 2023 e 2024 e está dotada con 60.000 euros, tal e como destacou a Consellería de Facenda e Administración Pública nunha nota de prensa.

Así, poderán acollerse a estas subvencións as asociacións galegas de persoas usuarias de software libre, coñecidas como Agusl, que estean formadas por persoas físicas, correctamente rexistradas no rexistro de asociacións de Galicia, e que recollesen nos seus estatutos, como un dos seus obxectivos principais, a difusión ou fomento do software e hardware libre.

O prazo de presentación, segundo recóllese nas bases, é dun mes desde este luns, día de publicación no DOG. A solicitude terá que facerse a través da sede electrónica da Xunta de Galicia, ou a través do procedemento AP400E e achegando a documentación correspondente, segundo especifican as bases da convocatoria. As asociacións interesadas poden contactar coa oficina de software libre da Axencia para a Modernización Tecnolóxica de Galicia para calquera aclaración que precisen ou axuda no proceso.

ACTIVIDADES SUBVENCIONABLES

Terán a consideración de actuacións subvencionables os proxectos ou actividades destinadas ao fomento do uso do software e hardware libre na Comunidade Autónoma de Galicia. En concreto, a organización ou participación activa en congresos, xornadas, conferencias, talleres ou eventos similares, de promoción e divulgación do software e hardware libre. A participación neste tipo de actividades deberá vir avalada pola importancia do evento nacional ou internacionalmente dentro da comunidade do Software Libre, así como a asistencia a congresos, xornadas, conferencias, talleres ou eventos similares de recoñecido prestixio dentro da comunidade do Software Libre.

Tamén se terán en conta a elaboración de contidos divulgativos e/ou formativos, que deberán publicarse cunha licenza de documentación libre aprobada pola Axencia para a Modernización Tecnolóxica de Galicia. Así mesmo, as fontes deste material deberán ser postas a disposición de dita Axencia en formatos abertos para que poidan ser difundidos a través das canles apropiadas para o efecto. Por outra banda, poderanse acoller a estas axudas iniciativas de desenvolvemento ou localización de proxectos de Software Libre que puidesen resultar de interese para a consecución dos obxectivos perseguidos nesta resolución. Calquera software desenvolvido no marco desta resolución deberá ser publicado cunha licenza libre aprobada pola Free Software Foundation ou a Open Source Initiative e publicado no Repositorio de Software Libre de Galicia.

Trading software | Fonte: Arquivo