Monterrei será a capital mundial da gaita galega durante este fin de semana

Os próximos 25 e 26 de agosto o Castelo de Monterrei acollerá a XXXVIII Xuntanza Internacional de Gaiteiros. Este foro naceu hai case 40 anos como complemento ás actividades da Escola Provincial de Gaitas da Deputación de Ourense.

A súa primeira edición tivo lugar o día 26 de xullo de 1986 no barrio da Ponte de Ourense, baixo a denominación de I Xuntanza de Gaiteiros do País. A partir desta edición o evento foi percorrendo distintos concellos da provincia de Ourense, establecéndose no 2007 como sede permanente no Castelo de Monterrei.

No ano 2016 foi declarado evento de Interese turístico e cultural pola Xunta de Galicia. "Cando un evento leva 38 anos é porque ten éxito. Desde a Deputación é unha honra colaborar cun acontecemento tan importante para a música tradicional galega e para toda a comarca de Monterrei desde un símbolo tan fermoso como é o Castelo", proclamou a vicepresidenta primeira da Deputación, Marta Nóvoa.

Ademais, en nome da institución provincial e do seu presidente, Luís Menor, a vicepresidenta primeira remarcou a vontade de seguir cooperando con outras administracións neste importante foro cultural.

Na presentación participaron tamén o delegado territorial da Xunta de Galicia, Gabriel Alén; así como o alcalde de Monterrei, José Luís Suárez, que puxo en valor non só a importancia cultural deste acontecemento, senón tamén o impulso dinamizador que supón para o municipio e para toda a comarca.

Pola súa banda, o fillo dun dos homenaxeados na 'Xuntanza', Nonito Pereira, agradeceu emocionado o recoñecemento ao seu pai.

Por último, o director da Escola de Gaitas da Deputación, Xosé Lois Foxo, lembrou que coa 38 edición desta reunión "márcanse 38 anos de vida coa gaita como parte fundamental da historia da civilización", e incidiu en que a filosofía deste evento "non só é divertimento: é a procura do coñecemento".

Gaita galega | Fonte: Consello da Cultura Galega