Degustacións de produtos galegos como o mel ou a tenreira no Festival da Luz en Boimorto
Este ano habilitarase unha tenda das experiencias de calidade onde se atoparán moitos dos produtos de diferentes denominacións de orixe, indicacións xeográficas protexidas e marcas de calidade diferencial galegas.
Por Europa Press / Redacción | A CORUÑA | 24/08/2023 | Actualizada ás 13:16
A Consellería do Medio Rural, a través da Axencia Galega de Calidade Alimentaria, estará presente un ano máis no Festival da Luz de Boimorto, que se celebra este fin de semana, cun programa de actividades e degustacións de produtos galegos.
Como novidade, este ano habilitarase unha tenda das experiencias de calidade onde se atoparán moitos dos produtos de diferentes denominacións de orixe, indicacións xeográficas protexidas e marcas de calidade diferencial galegas. Nela os asistentes tamén poderán facer un percorrido virtual pola plataforma www.experienciasdecalidade.gal.
En canto á programación, o sábado 26 as actividades comezarán ás 11.00 horas cunha cata de mel, ademais de dar a coñecer distintos produtos con certificación ecolóxica por medio dunha receita e unha charla divulgativa, que serán impartidos por persoal do Consello Regulador de Galicia. O pan, o pemento de herbón ou os queixos serán algúns dos produtos que se darán a coñecer xunto a outros como a tenreira galega, dentro das actividades e as charlas programadas.
