Reclaman a dotación de cascos de protección individual para os axentes da Policía Nacional de Ferrol-Narón
O Sindicato Unificado de Policía, a ravés dun comunicado, detallan que "esta petición foi constantemente desatendida", por parte da Dirección Xeral da Policía.
Por E.P. | Ferrol | 11/09/2023 | Actualizada ás 17:45
O Sindicato Unificado de Policía reclamou que se dote a todos os axentes da Policía Nacional da comisaría de Ferrol-Narón adscritos ao Grupo Operativo de Resposta (GOR) e ao Grupo de Atención ao Cidadán (GAC) de "cascos de protección individual para intervir puntualmente en incidente de orde pública non previstos e que se produzan de forma sobrevinda".
Así, inciden nesta petición, agora máis necesaria, tras a chegada do Racing de Ferrol á Segunda División e á importante afluencia de espectadores en cada xornada de liga ao campo da Malata. A través dun comunicado destallan que "esta petición foi constantemente desatendida", por parte da Dirección Xeral da Policía.
Así mesmo, avisan de que "non constan escritos ou peticións formais desde a comisaría provincial da Coruña á Xefatura Superior de Policía de Galicia ou á Subdirección Xeral de Loxística e Innovación da Policía", para desta forma "preservar a protección dos policías nacionais".
UNIDADE DE PREVENCIÓN E REACCIÓN
Desde o Sindicato Unificado de Policía, tamén han destallado que esta organización "leva desde hai 10 anos reclamando a posta en funcionamento dunha Unidade de Prevención e Reacción na comisaría de Ferrol-Narón, a cal podería dar cobertura a eventos deste tipo", en alusión aos partidos de fútbol.
Ademais, tamén participan noutros traballos como dispositivos especiais de prevención da delincuencia, mantemento da orde pública e seguridade cidadá, dando apoio a outras unidades, servizos ou institucións, en dispositivos puntuais como poden ser o tráfico de drogas ou rexistros e detencións no marco de investigacións levadas a cabo polos integrantes da unidade de Policía Xudicial.
REFORZO DO PARTIDO
No caso concreto deste domingo, desde o SUP critican que o comisario principal, xefe provincial da Coruña, "non considerase oportuno reforzar a seguridade do partido do Racing de Ferrol contra o Villareal B con persoal pertencente á Unidade de Prevención e Reacción" doutras comisarías de Galicia, ou con policías adscritos á Unidade de Intervención Policial das bases da Coruña ou Vigo.
Así, explican que "nos momentos previos, durante a disputa do partido e despois do encontro, púxose en risco a seguridade física dos axentes, ao non contar nin cos medios necesarios nin coa formación necesaria, nin co número de axentes suficientes para restablecer a orde pública". Respecto diso, avisan de que "se tramitaron varias denuncias por tenencia ou consumo de sustancia estupefaciente e por infracción da Lei do Deporte".
É por iso que aseguran que no caso de que se volvan a dar situacións como a vivida este domingo e non contar coa presenza de unidades especiais ou especializadas en orde pública, e algún axente resulte lesionado no desenvolvemento de tal dispositivo, "exerceranse as accións administrativas ou xudiciais pertinentes contra a persoa responsable de deixar desprotexidos aos funcionarios".
